საზოგადოების ნაწილი ფილმის პრემიერის ჩაშლით იმუქრება. ,,და ჩვენ ვიცეკვეთ“ , რომელიც ქვიარ თემატიკაზეა შექმნილი დაპირისპირების მიზეზად იქცა. ქართული მარში, საპატრიარქო და ბავშვთა უფლებების დაცვის საზოგადოება იმუქრებიან, რომ კინოთეატრების პიკეტირებას მოახდენენ. შსს მ აღნიშნულთან დაკავშირებით განცხადება გაავრცელა. ,,შინაგან საქმეთა სამინისტრო უზრუნველყოფს როგორც საზოგადოებრივი უსაფრთხოებისა და მართლწესრიგის დაცვას, ასევე, თითოეული ადამიანის გამოხატვის თავისუფლებას, რომელიც არ სცდება კანონით დასაშვებ ფარგლებს.“ წერია განცხადებაში. თემის დეტალებით ახლა სულხან მესხიძე გვიერთდება, რომელიც პოლიტიკოსების მოსაზრებებს გაგვაცნობს.
სასულიერო პირები მშობლებს მოუწოდებენ არ გაუშვან შვილები ფილმის "და ჩვენ ვიცეკვეთ" ჩვენებაზე. მათი თქმით, ეს არის გარყვნილების პროპაგანდა, შესაბამისად ფილმის ჩვენების საწინააღმდეგოდ დაგეგმილი აქციები არის კარგი და თავადაც აპირებენ ამ პროცესში მონაწილეობას. მამაოები მედიას და მთავრობასაც მოუწოდებენ ხელი არ შეუწყონ გარყვინილებას.
ეს შავრაზმული ექსტრემისტული ჯგუფები ხელისუფლებასთან პირდაპირ არიან კავშირში – ასე გამოეხმაურა “ნაციონალური მოძრაობის” წევრი, რომან გოცირიძე ბიზნესმენ ლევან ვასაძის განცხადებას, რომლის მიხედვითაც იგი თბილისში, 8 ნოემბერს ფილმის პრემიერის ჩატარების საშუალებას არ მისცემს. დეპუტატი აქვე გამოთქვამს სინანულს, რომ მან ბილეთის შეძენა მან ვერ მოასწრო.
ევროპული საქართველოს წევრის თქმით, ლევან ვასაძე ქართულ ოცნებასთან დაახლოვებული პირია, რომელიც ექსტრემისტული დაჯგუფების წევრია. გიორგი კანდელაკი სხვადასხვა ძალადობრივ შემთხვევებს იხსენებს და ამბობს, რომ შინაგან საქმეთა სამინისტროს ფაქტებზე მკაცრი რეაგირება არასდროს ჰქონია, რაც ძალადობას ახალისებს.
ლევან ვასაძე ისეთ თემებზე აქტიურობს, რომელიც რუსეთის ინტერესებში შედის - ასე ფიქრობს გირჩის ერთ-ერთი ლიდერი. ზურაბ ჯაფარიძის მოსაზრებით, არავის საქმე არა არის ზრდასრული ადამიანი რა შინაარსის ფილმს უყურებს კინოთეატრში.
არჩილ თალაკვაძის თქმით, თუ ვინმეს პროტესტის გამოხატვა უნდა, შეუძლია ეს მშვიდობიანი ფორმით, კანონმდებლობის შესაბამისად გააკეთოს. რაც შეეხება თავად ფილმს, პარლამენტის თავმჯდომარის განცხადებით: „ჩვენ გვაქვს თავისუფალი ქვეყანა, კულტურული საზოგადოება და ყველას შეუძლია, ხელოვნებაში თავისი თავი გამოხატოს ისე, როგორც ამას საჭიროდ თვლის. შესაბამისად, აქ სხვა კითხვები არ არსებობს“.
უკვე ცნობილია, რომ საქართველოში ფილმის პრემიერას არც მსახიობები და არც გადამღები ჯგუფის წევრები დაესწრებიან. მიზეზად მათი უსაფრთხოება სახელდება. იმის გამო, რომ ფილმი გეი-სიყვარულის შესახებაა, ავტორებმა არ იციან, რა რეაქცია მოჰყვება მის ჩვენებას საქართველოში.
ფილმი "და ჩვენ ვიცეკვეთ" არის ქართულ/შვედური წარმოების ქვიარ თემატიკაზე შექმნილი დრამა, რომლის პრემიერაც კანის კინოფესტივალზე გაიმართა, ფილმი ერთ-ერთი იყო მათ შორის, რომელიც ყველაზე დადებითად შეაფასეს ფესტივალზე. შეგახსენებთ, რომ პრემიერა 8-10 ნოემბერს კინოთეატრებში დაგეგმილი, რომლის ბლოკირებასაც, პროტესტის ნიშნად, „ქართული მარში გეგმავს“