24, დეკემბერი 2019 09:50:00
ქობულეთში ავტოსაგზაო შემთხვევის შედეგად დაშავებული სამი წლის ბავშვი ბათუმის იაშვილის დედათა და ბავშვთა ცენტრში მართვით სუნთქვაზე იმყოფება. მას ორი რთული ოპერაცია ჩაუტარდა. თავდაპირველად ქობულეთის რეგიონულ ჰოსპიტალში ბავშვს მუცლის ღრუს ოპერაცია გაუკეთეს, საღამოს კი ბათუმში გადაიყვანეს.
აჭარის ჯანდაცვის მინისტრის, ზაალ მიქელაძის განცხადებით, ბავშვის მდგომარეობა სტაბილურად მძიმეა.
შემთხვევა დღეს ქობულეთი-ოზურგეთის გზაზე მოხდა. ერთმანეთს ტრაილერი და მსუბუქი ავტომანქანა დაეჯახნენ. მომხდარის შედეგად, დაიღუპა ოთხი ადამიანი – ცოლ-ქმარი, მათი ათი წლის შვილი და ნათესავი. ბავშვი, რომელიც ბათუმის დედათა და ბავშვთა ცენტრშია, გარდაცვლილების მეორე შვილია.