31, იანვარი 2020 21:54:00
ანალიტიკურმა მედია ორგანიზაცია „ფაქტ-ჩეკმა“ აჭარაში არსებულ საჯარო სამსახურებში შტატგარეშე დასაქმებულთა შესახებ კვლევა ჩაატარა. მონიტორინგის შედეგად ირკვევა, რომ 2017 წლიდან მოყოლებული ხელშეკრულებით აყვანილ პირთა რაოდენობა და შესაბამისად ანაზღაურება, ყოველწლიურად კლების ნაცვლად, იზრდება. რას ნიღბავს, რეგიონის ხელისუფლება? და როგორ აფასებს ანალიტიკას ოპოზიცია?
„ფაქტჩეკის“ მიერ, ჩატარებული კვლევის მიხედვით ირკვევა, რომ 2017-2020 წლებში, საჯარო სამსახურებში, შტატგარეშე თანამშრომელთა რაოდენობა იზრდება. აჭარის მთავრობაში, სამინისტროებში და მათ დაქვემდებარებაში არსებულ ორგანიზაციებში ხელშეკრულებით დასაქმებულთა რაოდენობა, ოთხი წლის განმავლობაში, 625 ადამიანი, ხოლო შრომის ანაზღაურება, დაახლოებით, 4 მილონ 500 ათასი ლარია. ანალიტიკოსი გარკვეულ მიგნებებზე საუბრობს.
ანალიტიკოსის თქმით, ხელშეკრულებით დასაქმებულ პირთა ანაზრაურების პროცესი, შტატით აყვანილი თანამშრომლებისგან განსხვავებით, შედარებით გაუმჭვირვალეა. ნაზი რეხვიაშვილის შეფასებით, აღნიშნული, შრომის ანაზღაურებისთვის განკუთვნილი თანხების ოდენობას ნიღბავს.
ოპოზიციაში კი ფიქრობენ, რომ უმრავლესობა ამ სახით საკუთარი საარჩევნო შტაბების აქტივს ასაქმებს. მირდატ ქამადაძის შეფასებით, ხელისუფლება ვერ ასაბუთებს, რაში სჭირდება ამდენი შტატგარეშე თანამშრომელი.
საკვლევ ობიექტებად აჭარის მთავრობა, ასევე, რეგიონის ეკონომიკის, ჯანდაცვის, სოფლის მეურნეობის, განათლების სამინისტროები და მათ დაქვემდებარებაში მყოფი ორგანიზაციები იყვნენ. თემასთან დაკავშირებით, სატელევიზიო კომენტარი არცერთმა ორგანომ არ გააკეთა. დარგობრივი უწყებების ნაცვლად კი, ფინანსთა და ეკონომიკის სამინისტროში წერილობით განმარტეს, რომ:
2017 წლის მაჩვენებლებთან მიმართებით, შრომის ანაზღაურების ზრდა, დაახლოებით, 61%-ია, ხოლო, 2020 წელს, შტატგარეშე მომუშავეთა რიცხოვნობა 80 ერთეულით მოიმატებს.