02, ივნისი 2020 21:18:00
ქობულეთში, ბულვარის მშენებლობა დასრულდა. ტურისტული ქალაქი ვიზიტორების დასახვედრად ემზადება. როგორ გამოიყურება ზღვისპირა ზოლი და რას შესთავაზებს მუნიციპალიტეტი სტუმრებს? ჩემი კოლეგა გიამბობთ
ასე გამოიყურება ქობულეთის განახლებული ბულვარი, რომლის რეაბილიტაციაც თითქმის ერთი წლის წინ დაიწყო. კეთილმოწყობილი გარემო მალევე შესამჩნევი გახდა ადგილობრივებისთვის. რეაბილიტირებული ინფრასტრუქტურა მათთვის ერთგვარი იმედი გახდა იმისა, რომ ტურისტული სეზონი წარმატებული იქნება.
ჯამში რეაბილიტაცია ორკილომეტრიან მონაკვეტს უტარდება. სამუშაოები, რომელიც უკვე დასრულებულია, პროექტის მხოლოდ პირველი ეტაპია. მოწესრიგდა მიწისქვეშა კომუნიკაცია, დეკორატიული ფილებით მოეწყო სასეირნო ზოლი და სავალი ნაწილი. პარალელურად, გაშენდა მწვანე ზოლი, დამონტაჟდა თანამედროვე ტიპის გარე განათების სისტემა. მოეწყო ბავშვთა სივრცეები, სპორტული მოედანი, სავარჯიშო კუთხე და ადგილები ველოპარკირებისთვის.
როგორ ემზადება ტურისტული ქალაქი ვიზიტორების მისაღებად და რას შესთავაზებს მუნიციპალიტეტის სტუმრებს? თემაზე მირიან ქათამაძესთან ერთად უნდა გვესაუბრა. შეთანხმების მიუხედავად, მუნიციპალიტეტის მერმა გადაცემაში მონაწილეობაზე უარი განაცხადა, ამის შესახებ კი ეთერამდე რამდენიმე წუთით ადრე გავიგეთ. მიზეზი არ აგვიხსნა. აქვე გეტყვით, რომ სანაპიროზე ტურისტებს გასახდელები და საშხაპეები წელსაც არ დახვდებათ. მოძველებული და ამორტიზებულია საბავშვო ატრაქციონები. დაპირების მიუხედავად, კინტრიშის ხეობაში კი საპიკნიკე ტერიტოერიები არ მოწყობილა. ქალაქში კი საპარკინგე ადგილები არ დამატებია. მოძველებული და გაუმართავია მუნიციპალური ტრანსპორტი. მიუხედავად იმისა, რომ მუნიციპალიტეტისთვის ტურიზმი პრიორიტეტულია წვიმიან ამინდში მერია სტუმრებს ვერაფერს სთავაზობს. როგორც უკვე გითხარით პრობლემის მოგვარების სავარაუდო ვადებსა და გეგმებზე მირიან ქათამაძესთან ერთად უნდა გვესაუბრა, თუმცა მან დაპირების მიუხედავად ეთერში მონაწილეობა არ ისურვა, არც პრესსამსახურმა და არც თავად მერმა ჩვენს სატელეფონო ზარებსა და წერილებს არ უპასუხეს.
აქ, ახლა უკვე მეორე ნაწილით გათვალისწინებული სამუშაოები გრძელდება, რომლის დასრულების შემდეგაც სრულად უნდა იყოს კეთილმოწყობილი სანაპირო ზოლი. ინსფრასტრუქტურა ადაპტირებული უნდა გახდეს შეზღუდული შესაძლებლობის მქონე პირებისთვის.
15 ივნისიდან შიდა ტურისტისთვის სეზონი ოფიციალურად იხსნება, პირველი ივლისიდან კი ქვეყანა საერთაშორისო ვიზიტორების მოლოდინშია. ქობულეთის მერის მოადგილე ირწმუენბა, რომ ქობულეთისთვის საზღვაო სეზონი წარმატებული იქნება.
ქობულეთის ბულვარის რეაბილიტაცია სრულად 2021 წლის მაისში უნდა დასრულდეს. ჯამში პროექტზე 6 მილიონ ლარზე მეტია გათვალისწინებული.