29, ივნისი 2020 21:45:00
სახლი, რომელსაც ქვების ცვენის გამო დანგრევის საფრთხე ემუქრება. სოფელ ერგეში მცხოვრებლებს რისკის შემცველ გარემოში ცხოვრება უკვე წლებია უწევთ. უზარმაზარი ლოდი, რომელიც შენობის მომიჯნავედ მდებარეობს, ნელ-ნელა იშლება და ნებისმიერ დროს შეიძლება მთლიანად ჩამოვარდეს. ხელვაჩაურის მუნიციპალიტეტის მერიაში ამტკიცებენ, რომ პრობლემის შესახებ ჩვენგან გაიგეს.
დავით ბოლქვაძე, სოფელ ერგეში, მეწყერსაშიშ ზონაში ცხოვრობს. ის, რომ საცხოვრებელი და საკარმიდამო ნაკვეთი სიცოცხლისთვის საშიშ ზონაშია, როგორც თავად ამბობს, გეოლოგებმა ორი წლის წინ დაასკვნეს. ფერდზე, რომელიც ეზოს ემიჯნება, უზარმაზარი ლოდია. მას წლებია ქვები ნაწილ-ნაწილ სცვივა და საცხოვრებელს დანგრევის საფრთხეს უქმნის. შენობას ქვის ცვენის შედეგეად უკვე დაბზარული აქვს ჭერი და კედლები.
ამას ისიც ემატება, რომ ყოველი უამინდობისას ლოდის ძირი მიწისგან ირეცხება და იზრდება მისი მთლიანად ჩამოვარდნის საფრთხე. ოჯახის უფროსი ამბობს, რომ ვეღარც იმ ქვეწარმავლებს უმკლავდება, რომლებიც ეზოში, ჩამოვარდნილ ქვებში ბუდობენ.
დავით ბოლქვაძის არაერთი მცდელობა, მიეღო დახმარება ხელვაჩაურის მერიისგან, როგორც თავად გვარწმუნებს, ყოველ ჯერზე უშედეგოდ დასრულდა. საპირისპიროს გვიმტკიცებენ მერიაში. ამბობენ, რომ ბოლქვაძეების პრობლემის შესახებ არასოდეს სმენიათ და ვითარებას მხოლოდ ამის შემდეგ შეისწავლიან.
როგორიც არ უნდა იყოს შესწავლის შედეგები, ხელვაჩაურის მერის მოადგილემ ასევე დადო პირობა, რომ პრობლემას მერიის შესაბამისი სამსახური დასკვნის დადებიდან 15 დღეში გადაჭრის.