13, აგვისტო 2020 21:59:00
ბათუმის ბიუჯეტში ცვლილებები შევიდა. ქალაქის მთავარი ფინანსური დოკუმენტი 26 მილიონი ლარით შემცირდა. გადაწყვტეილებები დღეს საკრებულოს სხდომაზე მიიღეს. სხდომა ტრადიციულად ხმაურიანი იყო. მმართველი გუნდის წევრებთან კითხვები ჰქონდა ოპოზიციას.
26 მილიონი ლარით შემცირდა ქალაქის ბიუჯეტი. გადაწყვეტილება დეპუტატებმა საკრებულოს სხდომაზე მიიღეს. მთავარი ფინანსური დოკუმენტის ცვლილება როგორც მერიის შესაბამის სამსახურებში განმარტეს, პანდემიის პერიოდში მოსაკრებლების შემცირებამ გამოიწვია. მიმდინარე წლის ქალაქის ბიუჯეტში შემოსულობები 172 მილიონი ლარით იყო განსაზღვრული, ახლა ეს მაჩვენებელი 158 მილიონ ლარამდე თანხა იქნება.
ბათუმის მერიის საფინანსო-საბიუჯეტო სამსახურის უფროსის ინფორმაციით, ბიუჯეტი ძირითადად კულტურული და სპორტული ღონისძიებების ხარჯზე შემცირდა. ანუ იმ ღონისძიებების, რომელთა განხორციელება დაგეგმილი იყო, თუმცა პანდემიის გამო ჩაიშალა. ცვლილება არ შეხებია სოციალურ პროგრამებს, რასაც ვერ ვიტყვით ჯანდაცვის მიმართულებაზე. ედნარ ნატარიძის თქმით, შენარჩუნდება ყველა ინფრასტრუქტურული პროექტი. ჩამონათვალში შედის სკვერების მოწყობა- რეაბილიტაცია. ასევე სტიქიის შედეგად მიყენებული ზიანის სალიკვიდაციო სამუშაოები.
სხდომაზე ხმაური ბიუჯეტში ცვლილებების შეტანის საკითხს მოჰყვა. ერთიანი ნაციონალური მოძრაობის წევრებმა თქვეს, რომ მმართველი გუნდი ტყუის, როცა აცხადებს რომ ბიუროკრატიული ხარჯი შეამცირა.
კიდევ ერთი საკითხი, რამაც ოპოზიციასა და მმართველი გუნდის წევრებს შორის დაპირისპირება გამოწვია უძრავი ქონების დროებით სარგებლობაში გადაცემის საკითხი იყო. ერთიან ნაციონალურ მოძრაობაში ამტკიცებენ, რომ აიპი „ბათუმის სახალხო აკადემია“ იმავე პერსონებითაა დაკომპლექტებული, რომლითაც ორგანიზაცია „გაბრაზებული ბათუმელები“.
საკრებულოს დღევანდელ სხდომაზე დღის წესრიგით გათვალისწინებული 5 საკითხი განიხილეს. ბათუმის ბიუჯეტი 10 მილიონ 300 ათასი ლარით აჭარის მთავრობიდან მიღებული ტრანსფერით შეივსო.