29, სექტემბერი 2020 21:45:00
ეპიდმდგომარეობა დღითიდღე უარესდება. საქართველოში ამ დროის მონაცემებით 34 პირია დაღუპული კორონავირუსით. ციფრების, სტატისტიკის, რეკომენდაციების, საერთო ფონის და არამხოლოდ ამ ყველაფრის შესახებ თქვენ ინფორმაციას ჩვენგან, ანუ მედიის საშუალებით იღებთ. ბუნებრივია პანდემიის ფონზე ჟურნალისტებს უამრავი კითხვა გვიჩნდება, თუმცა ბოლო დროს, პასუხისმგებელი პირებისგან ერთი უცნაური ტენდენცია შეინიშნება. რეპორტაჟს 9-ის ნახევარზე ნახავთ
ეპიდმდგომარეობის გაუარესების პარალელურად გაჩენილი კითხვები, რომლებზე პასუხების მიღება გართულდა. მას შემდეგ, რაც ქვეყნის ხელისუფლება და ჯანდაცვის სისტემა განსაკუთრებული გამოწვევის წინაშე დადგა, მედიასთან გაცილებით დახურული გახდა, ვიდრე ეს კოვიდ 19-ს პირველი ტალღის შემოტევისას. ჟურნალისტებს ხშირად კომპეტენტურ და პასუხისმგებელ პირებთან არც შეკითხვების დასმის საშუალება გვეძლევა. ის რაზეც იოლად საუბრობენ, სტატისტიკაა.
ზედაპირული ინფორმაციის გავრცელებაზე საუბრობს რუსთავი 2-ის ჟურნალისტიც. ლაშა ველიაძე ამბობს, რომ კოვიდ დადებითი შემთხვევების შესახებ ახალ ამბავს ჯანდაცვის სამინისტროსგან დროულად იღებს, თუმცა ახალი რეგულაციების შესახებ აჭარის მთავრობისგან მხოლოდ შეტყობინება მისდის, რასაც განმარტებები, ხშირ შემთხვევაში, თან არ ახლავს.
ინფორმაციის გარეშე დარჩენილი მაყურებელი კახეთში. გურჯაანის ტელევიზიაში ამბობენ, რომ ხშირად, მთელი დღე სჭირდებათ იმის დასაზუსტებლად, როგორია ეპიდმდგომარეობა რეგიონში, კონკრეტულად სად არის დადასტურებული შემთხვევები და რამდენად გამართულია ადგილობრივ დონეზე ჯანდაცვა. ის პირები, ვისგანაც დეტალური ინფორმაციის მიღებაა შესაძლებელი, გურჯაანის ტელევიზიას, ეთერში სტუმრობაზეც, მუდმივად უარს ეუბნებიან.
ანალოგიურია პრრობლემები ახალციხეშიც. „მე-9-ე არხში“ ამბობენ, რომ ინფორმაციას ადგილობრივ დონეზე ვერ იღებენ და ახალი ამბების გაშუქებისას, დედაქალაქში ჩანიშნულ ბრიფინგებს ელოდებიან. ჟურნალისტები ამბობენ, რომ დაავადებათა კონტროლის ეროვნულ ცენტრში, მათ სატელეფონო ზარებს არ პასუხობენ.
რატომ გართულდა ხელისუფლებასა და მედიას შორის კომუნიკაცია პანდემიასთან ბრძოლის საკითხებზე, ჟურნალისტები აღნიშნავენ, რომ კოვიდ19-ის მეორე ტალღას, პროგნოზების მიუხედავად, ქვეყანა მოუმზადებელი შეხვდა და ბევრ კითხვაზე სისტემას პასუხი არ აქვს.