21, იანვარი 2021 21:15:00
არასრულად შევსებული ქონებრივი დეკლარაციები და ჯარიმები, რომელთა გადახდაც მაღალი თანამდებობის პირებს მოუწევთ. ქვეყნის მასტაბით, მათ შორის აჭარაშიც, როგორც მთავრობის, ისე თვითმმართველობების დონეზე, საჯარო მოხელეთა მიერ შევსებული ქონებრივი დეკლარაციები „საჯარო სამსახურის ბიურომ” შეისწავლა. მონიტორინგი 2019-2020 წლების მდგომარეობას ასახავს. რეგიონში, შეუსაბამობა 8 თანამდებობის პირს გამოუვლინეს.
2020 წელს, არასრულად შევსებული ქონებრივი დეკლარაციისთვის, აჭარაში, სულ რვა საჯარო მოხელე დაჯარიმდა. მათ ხაზინაში 500-დან 1000 ლარამდე უნდა გადაიხადონ. არასრულად შევსებული დეკლარაცია საჯარო სამსახურის ბიურომ შეისწავლა. გამოიკვეთა, რომ თანამდებობის პირები, დოკუმენტებში, განსაკუთრებით ოჯახის წევრების სახელზე არსებულ ქონებებს მალავენ.
ქობულეთის საკრებულოს თავმჯდომარე - დავით მჭედლიშვილი ერთ-ერთიამ, ვისაც დეკლარაციაში არ მითითებული ქონების გამო, ჯარიმის სახით, 700 ლარის გადახდა მოუწევს. მან დამალა, რომ სამეწარმეო საქმიანობა ჰქონდა.
აღმოჩნდა, რომ, გასულ წელს, დეკლარაციაში, მათ სახელზე არსებული ქონება სრულად არ ასახა: აჭარის მთავრობის ადმინისტრაციის უფროსმა - თინათინ ზოიძემ, რომელიც კვლევის პერიოდში, აჭარის ფინანსთა და ეკონომიკის სამინისტროში მუშაობდა, აკაკი ძნელაძემ - განათლების მინისტრის მოადგილემ, ქობულეთის საკრებულოს თავმჯდომარის მოადგილემ - ნათია თხილაიშვილმა და იაკინთე ჩხარტიშვილმა, რომელიც აჭარის საზოგადოებრივი მაუწყებლის დირექტორის მოადგილეა. იგი გასულ წელს, აჭარის სავაჭრო-სამრეწველო პალატის თავმჯდომარე იყო.
საჯარო სამსახურის ბიურომ, დოკუმენტში დარღვევები დაუფიქსირა, შუახევის ყოფილ მერს და მის მოადგილესაც. როგორც ფრიდონ ფუტკარაძემ, ისე ომარ ტაკიძემ დაკისრებული ჯარიმა გაასაჩივრა. ფიქრობენ, რომ დარღვევები უმნიშვნელოა.
ქონებრივი დეკლარაციების მონიტორინგი რომ კორუფციასთან ბრძოლისთვის მნიშვნელოვანი კომპონენტია, ხაზგასმით აღნიშნავენ "საერთაშორისო გამჭვირვალობა საქართველო"-ში, თუმცა ორგანიზაციაში, მმართველი გუნდის მიერ გასულ წელს განხორციელებული საკანონმდებლო ცვლილებებისთვის აკრიტიკებენ. მალხაზ ჭკადუა იხსენებს, როგორ შეამსუბუქეს კანონი, არასრულად შევსებული დეკლარაციების შემთხვევაში, პარლამენტარების მიმართ, ერთხელ უკვე გატარებული სანქციების შემდეგ.
შემთხვევით შერჩევის პრინციპით, სულ 282 საჯარო მოხელის ქონებრივი დეკლარაცია გადამოწმდა, რაც საერთო რაოდენობის მხოლოდ 5%-ია. მათგან, დაჯარიმდა - 126 ჩინოვნიკი, გაფრთხილდა - 23, ხოლო წარმოება შეწყდა - 7 შემთხვევაში. შემდგომი ძიებისთვის, ერთ შემთხვევაში გადაიგზავნა დოკუმენტაცია პროკურატურაში.