02, მარტი 2021 10:38:00
გარემოს დაცვისა და სოფლის მეურნეობის სამინისტროს მიერ მომზადებული „გარემოსდაცვითი პასუხისმგებლობის შესახებ“ კანონპროექტი დამტკიცებულია. მხარი გარემოს დაცვისა და ბუნებრივი რესურსების კომიტეტმა დღეს, მესამე მოსმენაზე განხილვას დაუჭირა.
კომიტეტის სხდომაზე განსახილველად საკანონმდებლო პაკეტი გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა წარადგინა.
„კანონპროექტს შემოაქვს სრულიად ახალი, ევროპული სტანდარტის გარემოსდაცვითი პასუხისმგებლობის მექანიზმი. თუ საწარმოს საქმიანობის შედეგად, გარემოს მიადგება მნიშვნელოვანი ზიანი, საწარმო ვალდებულია გასწიოს ამ ზიანის გამოსასწორებლად საჭირო ხარჯები და შეასრულოს ზიანის გამოსასწორებელი ღონისძიებები, რაც მიმართული იქნება დაზიანებული გარემოს პირვანდელ მდგომარეობაში ან მასთან მიახლოებულ მდგომარეობაში აღდგენაზე. ვალდებულების შეუსრულებლობის შემთხვევაში, კანონპროექტს, ევროპული სტანდარტების შესაბამისად, შემოაქვს საკმაოდ მაღალი საჯარიმო სანქციები“ - განმარტა ნინო თანდილაშვილმა.
გარემოს დაცვისა და სოფლის მეურნეობის სამინისტროს ცნობით, „გარემოსდაცვითი პასუხისმგებლობის შესახებ“ კანონპროექტი გარემოსდაცვითი ზიანის ფონდის შექმნას ითვალისწინებს. ცალკეულ შემთხვევაში, ზიანის ფულადი ანაზღაურების შედეგად გადახდილი თანხები სწორედ აღნიშნულ ფონდში ჩაირიცხება. სამინისტროს ცნობით, მსგავსი ფონდები უკვე მრავალი წელია არსებობს და წარმატებით ფუნქციონირებს თითქმის ყველა ევროპულ ქვეყანაში.
საქართველო არის პირველი, აღმოსავლეთ პარტნიორობის ქვეყნებს შორის, სადაც ასეთი ტიპის ფონდი შეიქმნება. აღნიშნულ ფონდში აკუმულირებული თანხები მოხმარდება გარემოს მდგომარეობის აღდგენას ქვეყნის სხვადასხვა მუნიციპალიტეტში, პრიორიტეტული გარემოსდაცვითი ღონისძიებების დასაფინანსებლად და გარემოს მდგომარეობის გასაუმჯობესებლად.