02, მარტი 2021 11:10:00
შარლ მიშელი გუშინ, მთელი დღის განმავლობაში ყველა მხარეს არწმუნებდა, რომ მოლაპარაკებები კონსტრუქციულ რეჟიმში უნდა გადასულიყო. დღეს კი ამის საპირისპიროდ, ოპოზიციის უკიდურესად დესტრუქციული მოქმედება ვნახეთ,- ამის შესახებ „ქართული ოცნების“ თავმჯდომარემ ოპოზიციის პიკეტირების კომენტირებისას განაცხადა.
მამუკა მდინარაძის თქმით, აქციები მოლაპარაკებების პროცესში კონტრპროდუქტიულია.
„პირობის დარღვევის პირველი პრეცედენტი უკვე ვნახეთ, დღევანდელი პიკეტირების მცდელობის სახით. ეს არ არის სწორი საქციელი და მოლაპარაკების პოზიტიურ შედეგთან ვერ მიგვიყვანს. თუმცა, ამის მიუხედავად ჩვენ მზად ვართ, მოლაპარაკების პროცესს ბოლომდე მივყვეთ, რომ სახელმწიფო ინტერესებიდან გამომდინარე პოზიტიური შედეგი დაიდოს.
თუ მათი მხრიდან დესტრუქცია გაგრძელდება და ერთი რაციონალური ნაბიჯი მაინც არ გადმოიდგმება, შეხების წერტილი ნაკლები იქნება, მაგრამ თუ ისინი კარგი გაგებით იძულებული გახდებიან, ერთი რაციონალური ნაბიჯი მაინც გადმოდგან, ამ შემთხვევაში, მარტივი იქნება მედიაცია,"- განაცხადა მდინარაძემ.