რეგულარული ფრენები აღდგენის პროცესშია. ამ ეტაპზე, მოსამზადებელი სამუშაოები მიმდინარეობს. რა უნდა გააკეთოთ, თუ კი უცხო ქვეყანაში წასვლას გადაწყვეტთ? რა რეგულაციების გათვალისწინება მოგიწევთ იმისათვის, რომ აეროპორტიდან თვითმფრინავამდე და თვითმფრინავიდან სასურველ, დანიშნულების ადგილზე ჩახვიდეთ? ჩემი კოლეგა არკვევდა.
თერმოსკრინინგის გავლისა და დისტანციის დაცვის გარდა, აეროპორტში შესვლისას რამდენიმე რეკომენდაციის გათვალისწინება მოგიწევთ. პროტოკოლი მათთვის, ვინც დასვენება ქვეყნის საზღვრებს ფარგლებს გარეთ დაგეგმა, საქართველოს ჯანდაცვის სამინისტრომ გასულ წელს შეიმუშავა. წესის მიხედვით, მგზავრს, მოსაცდელს სივრცეში შესვლისთანავე ადგილზე მითითებების შესრულება და პირადი ჰიგიენის ნორმების დაცვა ევალება.
თავის მხრივ, ვალდებულებები აქვს აეროპორტის ადმინისტრაციასაც. პროტოკოლის მიხედვით, აუცილებელია პასპორტისა და ბარგის შესამოწმებელი ადგილების ბარიერებით აღჭურვა. ხშირად უნდა მოხდეს ხშირად გამოყენებული ზედაპირების დეზინფექცია. პრევენციული ღონისძიებების შესახებ კი მგზავრი პერიოდულად უნდა იყოს ინფორმირებული აუდიო-ვიდეო გიდის საშუალებით.
ლალი ჯაფარიძე ერთ- ერთია, ვინც კოვიდპანდემიის პირობებში მგზავრობა გერმანიაში დაგეგმა. ძირითადი რეკომენდაციების დაცვის გარდა, საზღვრის კვეთამდე, აეროპორტში სწრაფი ტესტის აღებაც მოუწია.
რა დოკუმენტაცია უნდა მოამზადოთ გაფრენამდე - ეს იმაზეა დამოკიდებული, თუ სად აპირებთ მოგზაურობას. ყველა ქვეყანას ინდივიდიალური პროტოკოლი აქვს. ამის შესახებ ინფორმაცია დეტალურად საქართველოს საგარეო საქმეთა სამინისტროს ოფიციალურ ვებ-გვერდზეა განთავსებული. ასე რომ, ვიდრე ბილეთების ძებნას დაიწყებთ, მოგიწევთ უწყების საიტს თვალი გადაავლოთ
ტურისტულ კომპანიებში სწორედ იმ სირთულეებზე საუბრობენ, რაც პანდემიასთან ადაპტირებამ გამოიწვია. „აჭარა ტური“ ბაზარზე წლებია ოპერირებს, თუმცა გენერალური დირექტორი ამბობს, რომ ბოლო ერთი წელია მუშაობა დაპაუზებულია. ირაკლი თავართქილაძე ამ ყველაფერს იმ ტექნიკურ სირთულეებს უკავშირებს, რაც პანდემიის პირობებში ფრენას ახლავს: კოვიდ-ტესტები, კოვიდ-დაზღვევა, კოვიდ-პასპორტი. ამბობს, რომ დამატებითი დოკუმენტაცია მგზავრს მოგზაურბას მნიშვნელოვნად უძვირებს.
იმ ფონზე, როცა მსოფლიო მუშაობის დისტანციურ რეჟიმზეა გადასული, ბათუმის საერთაშორისო აეროპორტის ოფიციალურ ვებ-გვერდზე კოვიდ-19-ის განყოფილება ვერ ვიპოვეთ. რამდენად მორგებულია სივრცე და ტერმინალები პანდემიას, ჩვენს დღეს ვერც შიდა კადრების გადაღება შევძელით. საზოგადოებასთან ურთიერთობის სამსახურმა ამის საშუალება არ მოგვცა.
2
s
s
s