„მაუგლის მეთოდები“ - ადრეული ასაკის ბავშვების განვითარებისა და მკურნალობის აგრესიული ფორმა, რომელიც საქართველოშიც გამოიყენება. სარეაბილიტაციო ვარჯიშების ამგვარმა ჩატარებამ, რამდენიმე დღის წინ, სამედიცინო და ფარმაცევტული საქმიანობის რეგულირების სააგენტოს ყურადღებაც მიიქცია. იგი უკანონო საექიმო საქმიანობად და მოზარდზე ძალადობის ფორმად სცნეს. ნინია მესხიძე გიამბობთ,რა საფრთხეები შეიძლება გამოიწვიოს „მაუგლის მეთოდებით“ რეაბილიტაციამ.
ერთ-ერთი ბოლო შემთხვევა, რომელმაც საზოგადოების ყურადღება მიიქცია, სოციალურ ქსელში, რამდენიმე დღის წინ გავრცელდა. კადრების გასაჯაროების შემდეგ, სამედიცინო და ფარმაცევტული საქმიანობის რეგულირების სააგენტომ, უკანონო საექიმო საქმიანობის განხორციელების ფაქტი დაადგინა. აღმოჩნდა, რომ ქალს, რომელიც საქართველოში „მაუგლის მეთოდის“ პოპულარიზაციას ახდენს, სპეციალური სამედიცინო ლიცენზია არ აქვს. შედეგად, ქეთევან მერებაშვილი ათასი ლარით დაჯარიმდა.
ეს პირველი შემთხვევაა არაა, როცა სარეაბილიტაციო მკურნალობას „მაუგლის მეთოდებით“ ატარებენ. მსგავსი ვიდეოები სოციალურ ქსელში ხშირად ვრცელდება და საზოგადოების ინტერესის საგანიც მალევე ხდება. რას ამბობს მტკიცებითი მედიცინა მსგავსი ტიპის მეთოდებზე და რამდენად საზიანოა ისინი ჩვილ ბავშვებში? პედიატრის განმარტებით, პატარებში, დიდი დოზით ფიზიკური დატვირთვა კატეგორიულად აკრძალულია. მზია ფევაძე შესაძლო რისკებზე საუბრობს.
„მაუგლის მეთოდით“ გაჯანსაღების მოწინააღმდეგეთა შორისაა ქეთევან ჯაველიძე. ექიმი-პედიატრი ამ ტიპის მოძრაობებს ბავშვისთვის საზიანოდ მიიჩნევს. მისი განმარტებით, ვიდეოებზე დაკვირვებითაც კი ადვილია იმის თქმა, რომ გამოყენებული მოძრაობები სარისკოა და პედიატრებისთვის ეს მეთოდი სამკურნალოდ ვერ ჩაითვლება.
მოსაზრებას რომ „მაუგლის მეთოდებით“ მკურნალობა ჩვილებისთვის საზიანოა, იზიარებენ ფსიქოლოგებიც. ეთერ ვარშანიძის შეფასებით, ხმაურიან თერაპია სასურველი შედეგის ნაცვლად, ბავშვის მდგომარეობას საფრთხის ქვეშ აყენებს.
ფაქტს, სახალხო დამცველიც გამოეხმაურა. ომბუდსმენის აპარატში აცხადებენ, რომ „მაუგლის მეთოდით“ მკურნალობა მოზარდების სიცოცხლისა და ჯანმრთელობისთვის რისკის შემცველ ჩარევას წარმოადგენს. მას ადრეულ ასაკში, შესაძლოა მძიმე და შეუქცევადი გართულებების განვითარება მოჰყვეს.
ჩვილ ბავშვებში დიდი დოზით ფიზიკური დატვირთვა, ანუ „მაუგლის მეთოდი“ საქართველოში, ჯერ კიდევ 90-იან წლებში დამკვიდრდა. ამგვარი ხერხებით მკურნალობა უკვე, ბავშვზე ძალადობის ფორმად სცნეს.
48
s
s
s