„TV 25“-ს ორი ერთმანეთისგან დამოუკიდებელი ინფორმირებული წყარო უყვება, რომ საჯარო მოხელეებს შორის ინციდენტი ხულოში, მერიის შენობასთან ორი კვირის წინ მოხდა. მათივე მტკიცებით, ხულოს საკრებულოს დეპუტატი მინდია რიჟვაძე არქივის უფროსს თემურ ბერიძეს ჯერ სიტყვიერად, მოგვიანებით კი ფიზიკურად დაუპირისპირდა.
დავის საგანი ხულოს მერიის მიერ განათების სისტემის მოწყობისთვის გამოცხადებული ტენდერი გახდა. წყაროს მტკიცებით, საჯარო მოხელეების ოჯახის წევრებზე და ახლობლებზე კომპანიებია რეგისტრირებული, რომლებსაც სახელმწიფო შესყიდვების შედეგების მათ სასარგებლოდ დასრულება სურდათ.
„იმის გამო, რომ ტენდერი ხულოს არქივის უფროსის მეგობარის სახელზე რეგისტირებულმა კომპანიამ მოიგო, ეს ფაქტი საკრებულოს დეპუტატისთვის მიუღებელი აღმოჩნდა. მინდია რიჟვაძე თემურ ბერიძეს ფიზიკურად გაუსწორდა, ფაქტს რამდენიმე თვითმხილველი ჰყავს“ - გვიყვება ინფორმირებული წყარო.
ირკვევა, რომ ინციდენტი ამით არ ამოწურულა და მხარეებს შორის მესამე დღეს დაძაბულობა ბათუმში, ყინულის მოედნის მიმდებარე ტერიტორიაზე გაგრძელდა, რომელშიც 50-მდე ადამიანი მონაწილეობდა.
„სასტიკად არის ნაცემი ხულოს არქივის უფროსი. მე როგორც ვიცი ამ ინციდენტში „ნაციონალური მოძრაობის“ წევრი ირაკლი ჯორბენაძე და მერიის შესყიდვების სამსახურის უფროსი ელდარ ბოლქვაძეც ფიგურირებდნენ, რომელსაც ტენდერებში საკუთარი ინტერესები აქვთ“ - აღნიშნავს მეორე წყარო, რომელმაც ვინაობის გამხელა არ ისურვა.
ბრალდების მთავარი ადრესატი, ხულოს საკრებულოს დეპუტატი ინციდენტს ადასტურებს, თუმცა მასში მონაწილეობას კატეგორიულად უარყოფს. ირწმუნება, რომ მას ისეთ რამეს აბრალებენ, რაც არ გაუკეთებია.
„მე არაფერი არ ვიცი, შესაძლოა მიზანმიმართულად იგონებენ. ვიყავი საგამოძიებო ორგანოში დაკითხვაზე და რა ინფორმაციაც მქონდა მივაწოდე“ - ამბობს მინდია რიჟვაძე.
მისი მტკიცებით, ტენდერებში მხოლოდ თემურ ბერიძე მონაწილეობს და მას სახელმწიფო შესყიდვებთან შეხება არასდროს ჰქონია.
ფიზიკური დაპირისპირების ფაქტს კატეგორიულად უარყოფს თემურ ბერიძე. გვარწმუნებს, რომ იგი სახელმწიფო შესყიდვებში არ მონაწილეობს და არც ინციდენტთან ჰქონია კავშირი.
„მე ამ ინფორმაციას არ ვადასტურებ, არავისთან არ მომსვლია კონფლიქტი“ - განაცხადა თემურ ბერიძემ, რომელმაც არ უპასუხა კითხვას: იყო თუ არა საგამოძიებო ორგანოში დაკითხვაზე.
„ჩხუბი იყო ორ კაცს შორის და მოვგვარდით“ - განაცხადა „ნაციონალური მოძრაობის“ წევრმა, თუმცა ირაკლი ჯორბენაძემ არ გვითხრა, რის გამო დაუპირისპირდნენ ერთმანეთს საჯარო მოხელეები. მისი მტკიცებით, სახელმწიფო შესყიდვებში მისი ასევე, ოჯახის წევრების ინტერესები არ იკვეთება და ტენდერებში მონაწილეობა არასდროს მიუღიათ.
„კი გავიგე რაღაც დაპირისპირება, რომ იყო, თუმცა დეტალები არ ვიცი“ - ამბობს ხულოს მერიის შესყიდვების სამსახურის უფროსი. ელდარ ბოლქვაძე მტკიცებით, სახელმწიფო შესყიდვები კანონის ფარგლებში ტარდება და იგი რომელიმე მხარეს პრივილეგირებულ გარემოში არ აყენებს.
„ყველაფერს გამოძიება გაარკვევს, მე ვერ შევიჭრები პოლიციის კომპეტენციაში“ - ამბობს ყოფილი ძალოვანი და ხულოს მოქმედი მერი. ვახტანგ ბერიძეს საჯარო მოხელეების ფიზიკური დაპირისპირების შესახებ ინფორმაცია გააჩნია, თუმცა მან ჩვენს შეკითხვებს არ უპასუხა და ტელეფონი გათიშა.
ხულოში, საჯარო მოხელეებს შორის ფიზიკური დაპირისპირების ფაქტზე პროკურატურამ გამოძიება ძალადობის მუხლით დაიწყო. უწყებაში არ განმარტეს რამდენი ადამიანი ფიგურირებდა ინციდენტში.