25, აპრილი 2017 20:22:00
1 მაისიდან საყოველთაო ჯანდაცვის პროგრამაში დიფერენცირებული პაკეტები ამოქმედდება და ზაფხულიდან პროგრამის ბენეფიციარებს, რომელთა სარეიტინგო ქულა არ აღემატება 100 000-ს ქრონიკული დაავადებების სამკურნალო მედიკამენტები დაუფინანსდებათ. ცვლილებათა პაკეტი დღეს მთავრობის სხდომაზე დაამტკიცეს. ბენეფიციარებს 5 ძირითადი ქრონიკული დაავადების სამკურნალო პრეპარატები დაუფინანსდებათ. როგორც ჯანდაცვის მინისტრმა განმარტა, ეს დაავადებებია: მაღალი არტერიული წნევა, გულის უკმარისობა, კორონალური სისხლძარღვების დაავადება, დიაბეტის მეორე ტიპი, რომელიც ტაბლეტური მკურნალობის ფორმას მოითხოვს, ფილტვების ქრონიკული დაავადებები, როგორიც არის ბრონქიალური ასთმა და ქრონიკული ობსტრუქციული დაავადება. ასევე ფარისებრი ჯირკვილის დაავადებები. რაც შეეხება მედიკამენტების ღირებულებას ამ ადამიანებისთვის, ეს იქნება თვეში მაქსიმუმ 1 ლარის ოდენობის გადასახადი.