„ახლა ვფიქრობ, ზუსტად 2 წლის შემდეგ ახალ გადაცემას ვიწყებ, ავტორი და წამყვანი ისევ მე ვარ, მაგრამ აქ კიდევ უფრო რთულადაა საქმე - მხოლოდ მარტო და მხოლოდ ერთი კაცი! თვითზიზოლაციაში ვარ.” - ეს ამონარიდია ნიგო ცეზარიშვილის ფეისბუქ პოსტიდან.
ნიგო ცეზარიშვილი, ყველასთვის კარგად ნაცნობი გადაცემა „სენტენციას“ ავტორი და წამყვანია. ეს გადაცემა ფეისბუქგვერდ "ლეღვაზე" იტვირთება. ქვეყანაში შექმნილი ვითარების გამო, გადაწყვიტა, რომ მაყურებელს სიახლეები სახლიდან გააცნოს. სწორედ ამ მიზნით, ნიგომ საკუთარი საცხოვრებლის ოთახი სტუდიად გადააკეთა, მის პირველ გადაცემას კი ხვალ, 20:00 საათზე იხილავთ.
რა გახდა ინსპირაციის წყარო?
- ,პატარაობიდანვე მოუსვენარი ვიყავი. ერთ წუთიანი დუმილი ჩემთვის საუკუნო მდუმარების ტოლფასი იყო. რაღაც უნდა გამეკეთებინა და ეს რაღაც ყოველთვის უკავშირდებოდა ორ რამეს - ენთუზიაზმსა და ჟურნალისტიკას.” უსაქმურად გატარებულმა ერთმა დღემ გიჟური იდეა დამიბადა, რომელიც ზუსტად 3 დღეში რეალობად ვაქციე. რადგან სტუმრებს ვეღარ ვღებულობთ - სასტუმრო ოთახი გადავაკეთე სტუდიად. საკანცელარიო ინსტრუმენტები და სამი დღე-ღამე მუშაობა.
ვინ დაგეხმარა იდეის განხორციელებაში და ვისთან ერთად წაიყვან გადაცემას?
- მხოლოდ ერთი კაცი. დეკორატორიც მე ვარ, მოხელეც, პროდიუსერიც, ოპერატორიც, ხმაც, ყურიც, მემონტაჟეც და რა თქმა უნდა წამყვანიც! ეს არის პირველი გადაცემა, რომელსაც მხოლოდ ერთი კაცი გაუძღვება - სოფელში, თვითიზოლაციაში მყოფი ჟურნალისტი.
როგორ შეხვდნენ ოჯახის წევრები შენს ამ გამოწვევას?
- დედაჩემის სიტყვები არასოდეს დამავიწყდება - "ღმერთმა ნუ ქნას ვინმეს ჰყავდეს ჟურნალისტი თვითიზოლაციაშიო, სახლი მთლიანად დაწება და რა მეშველება არ ვიციო."
რა თემატიკაზე ისაუბრებ გადაცემაში?
- ამ გადაცემაში პრობლემებზე უნდა ვისაუბროთ. გადაჭრისა და მოგვარების გზებზე. ბევრი სტერეოტიპი და კიდევ ბევრი დაბრკოლებაა ჩვენს ირგვლივ, რომელიც უნდა გადავლახოთ. ამასთან, მნიშვნელოვანია სხვადასხვა ადამიანების აზრი, რათა გავიგოთ ვინ როგორ და რას ფიქრობს. ახლა მსოფლიოში გაფანტული ემიგრანტების ხმა თავს აქ, ამ პატარა კუთხეში მოიყრის და კვლავ მსოფლიოში გაიფანტება.
რას გრძნობდი პირველი გადაცემის ჩაწერისას?
- ისე ვღელავდი როგორც მაშინ, პირველი ჟურნალი, რომ გამოვუშვი. ვფიქრობ, უკვე მერამდენეჯერ ვიწყებ ნულიდან. არადა ახლა იმასაც ვფიქრობ, რა გიჟი ვარ!
ნიგო ცეზარიშვილი მაყურებელს საინტერესო და ექსკლუზიურ გადაცემებს ჰპირდება.
სიუჟეტი TV25.GE-ს არქივიდან: