07, აპრილი 2020 21:22:00
აჭარაში, კორონავირუსის შიდა გავრცელების პირველი შემთხვევა დღეს დადასტურდა. ინფიცირებული ორი დღის განმავლობაში, ორ სხვადასხვა კლინიკაში იმყოფებოდა. მას შეხება ჰქონდა ორივე სამედიცინო დაწესებულების მედპერსონალთან. პაციენტის ინფიცირების წყარო უცნობია და ამ დრომდე მიმდინარეობს კონტაქტების მოძიება. 60 წლამდე ასაკის ინფიცირებული ქალი ქობულეთის ერთ-ერთ სოფელშიც, ერთი კვირის განმავლობაში იმყოფებოდა. მთელი დღის განმავლობაში სპეციალისტები ქობულეთსა და ბათუმში კონტაქტების შესწავლას ახორციელებდნენ.
კორონავირუსის შიდა გავრცელების პირველი შემთხვევა აჭარაში დღეს დაფიქსირდა. იგი 60 წლის ქალია, რომელსაც ინფექციურ საავადმყოფოში ორმხრივი პნევმონია დაუდგინდა. პაციენტის ინფიცირების წყარო უცნობია. კონტაქტების მოძიება ამ დრომდე მიმდინარეობს. როგორც ცნობილი გახდა, ქალს ვირუსისთვის დამახასიათებელი სიმპტომები არ ჰქონდა. აღენიშნებოდა მხოლოდ მუცლის ტკივილი და დიარეა.
ვიდრე საბოლოო დიაგნოზს დაუსვამდნენ, ქალმა მუცლის ტკივილის ჩივილით, ბათუმში ორ სამედიცინო დაწესებულებას მიმართა. ერთ შემთხვევაში თანამშრომლები თვითიზოლაციაში იმყოფებიან, ხოლო ჯანმრთელობის ცენტრ „მედინა“-ს ის პერსონალი, რომლებთანაც შემხებლობა ჰქონდა, დღეს კარანტინში გადაიყვანეს.
ვიდრე ქალი სამედიცინო დაწესებულებებს მიმართავდა, მან ორჯერ გამოიძახა ბათუმის სასწრაფო-სამედიცინო დახმარების ბრიგადა. ორივე ჯგუფი, ჯამში ექვსი ადამიანი ასევე კარანტინშია მოთავსებული.
კიდევ უფრო ადრე, სანამ ინფიცირებული ქალი ჩივილებს იგრძნობდა, ერთი კვირის განმავლობაში, ქობულეთის ერთ-ერთ სოფელში, სტუმრად იმყოფებოდა. შესაბამისად, კონტაქტების მოძიებაზე როგორც ქობულეთში, ისე ბათუმში აქტიურად მუშაობენ ეპიდემიოლოგები.