16, მარტი 2021 10:19:00
მოწოდებები, რომ ჩაიშალოს! გავაგდოთ ინვესტორი! გაჩერდეს! არ ავაშენოთ! - არ არის ჩვენი ლექსიკა. - ამის შესახებ საქართველოს ეკონომიკისა და მდგრადი განვითარების მინისტრმა „ნამახვანჰესის“ მშენებლობის საკითხზე მოსახლეობის პროტესტის საპასუხოდ განაცხადა.
ნათია თურნავას განმარტებით, პოსტპანდემიურ წელს, ყველანი განვითარებისკენ უნდა ვისწრაფვოდეთ. აღნიშნა, რომ ამ საკითხთან დაკავშირებით მთავრობისთვის ულტიმატუმის ენა მიუღებელია.
„ჩვენთვის მიუღებელია ულტიმატუმის ენა. რაც შეეხება მინისტრის გადადგომას ან დანიშვნას, ყველას შევახსენებ, რომ საქართველოს მთავრობის წევრის დანიშვნა ან გადაყენება პრემიერ-მინისტრის პრეროგატივაა და არა რომლიმე აქტივისტის აქციაზე გაჟღერებული მოთხოვნა. ჩვენ ძალიან მნიშვნელოვანი შეთავაზებები და გადაწყვეტილებები მივაწოდეთ მოსახლეობასაც და ექსპერტებსაც. ჩვენი კარი კვლავაც ღიაა დიალოგისთვის, ოღონდ კონსტრუქციულ პლატფორმაზე. ველით მოსახლეობის წარმომადგენლებს, ველით ექსპერტებს, იმისთვის, რომ ჩაერთონ პროცესში, გააკეთონ პროექტის რევიზია, გადაამოწმონ ის კვლევები, რაც ჩატარებულია. ყველამ ერთად ვიზრუნოთ, რომ ჩვენი ენერგეტიკა, ჩვენი ეკონომიკა გახდეს უფრო ძლიერი“, - განაცხადა თურნავამ.