08, აგვისტო 2021 18:52:00
ბათუმის ილია ჭავჭავაძის სახელობის სახელმწიფო დრამატული თეატრის მსახიობი, საქართველოს სახალხო არტისტი, მემედ აბაშიძის, იუსუფ კობალაძისა და ვერიკო ანჯაფარიძის სახელობის პრემიების ლაურეატი ნინო საკანდელიძე გარდაიცვალა. ამის შესახებ ინფორმაცია ბათუმის დრამატულმა თეატრმა გაავრცელა.
ნინო საკანდელიძე 1955 წელს თბილისის სახელმწიფო თეატრალური ინსტიტუტის სამსახიობო ფაკულტეტის დამთავრების შემდეგ გარდაცვალებამდე ბათუმის ილია ჭავჭავაძის სახელობის სახელმწიფო დრამატულ თეატრში მუშაობდა. გადაღებულია ფილმებში: „ზღვის შვილები“, „მსურველებს შეუძლიათ ჩაეწერონ“ და „თეთრი ქვები“.
მან ბათუმის დრამატულ თეატრში შექმნა არაერთი საეტაპო სცენური სახე, რომელთა შორის აღსანიშნავია: ოფელია (ჰამლეტი), დეზდემონა (ოტელო), მარია (მეთორმეტე ღამე), მირანდოლინა (სასტუმროს დიასახლისი), ხათუნა (ჯარისკაცის ქვრივი), ლელა (ზვავი), ლელა (ალუდა ქეთელაური), ვარვარა (ეგორ ბულიჩოვი და სხვები), ემილი (ესპანელები), ინფანტა (სიდი), ფოფოდია (გუშინდელნი), მარიკა ჩოდრიშვილი (ხიდი), მარიამი (შენსკენ სავალი გზები), ნინელი (ექვსი შინაბერა და ერთი მამაკაცი) და მრავალი სხვა.
ნინო საკანდელიძე რამდენიმე ლექსების კრებულის ავტორიცაა.
ქართული თეატრალური ხელოვნების განვითარებაში შეტანილი განსაკუთრებული წვლილისათვის ნინო საკანდელიძეს მინიჭებული აქვს აჭარის დამსახურებული არტისტის (1961), საქართველოს დამსახურებული არტისტის (1976), საქართველოს სახალხო არტისტის (1987) საპატიო წოდებები. ქალის როლის საუკეთესო შესრულებისათვის არაერთგზის დაჯილდოებულია თეატრალური პრემიით.
ბათუმის დრამატული თეატრის შესასვლელთან გახსნილია ნინო საკანდელიძის სახელობის ვარსკვლავი.