14, ოქტომბერი 2021 11:20:00
ბათუმში, 26 მაისის ქუჩაზე არსებული კორპუსების დემონტაჟი იგეგმება. ამის შესახებ ბათუმის საკრებულოს დღევანდელ სხდომაზე განაცხადეს.
მერიის საფინანსო-საბიუჯეტო სამსახურის უფროსის განმარტებით, სამხარაულის ექსპერტიზის დასკვნის საფუძველზე, შენობები გამაგრებით სამუშაოებს არ ექვემდებარება.
ედნარ ნატარიძის თქმით, დემონტაჟისთვის ბიუჯეტიდან 500 ათასი ლარი გამოიყოფა.
ნატარიძის ცნობითვე, შესაძლოა 26 მაისის 13 ნომერში, ისევ კორპუსი აშენდეს, თუმცა ამ საკითხზე გადაწყვეტილებას მოქალაქეებთან მოლაპარაკებების შემდეგ მიიღებენ.
ამ ეტაპზე, იქ მცხოვრები 23 ოჯახი ქირითაა გაყვანილი.
შეგახსენებთ, ბათუმში, 26 მაისის ქუჩაზე, მრავალსართულიანი საცხოვრებელი კორპუსი 8 ოქტომბერს ჩამოინგრა. შედეგად, 9 ადამიანი დაიღუპა.