15, იანვარი 2019 17:10:00
ბათუმის ხელოვნების სახელმწიფო სასწავლო უნივერსიტეტს ახალი რექტორი ჰყავს. სასწავლებლის აკადემიური საბჭოს გადაწყვეტილებით, ამ პოზიციაზე მაია ჭიჭილეიშვილი აირჩიეს. მან სასწავლებლის უკვე ყოფილი რექტორი, ერმილე მესხია ჩაანაცვლა. ამ უკანასკნელს კი, სასწავლებლის შინაგანა წესის მიხედვით, ვადა ამოეწურა.
უკვე ახალ რექტორს კონკრეტული ამოცანები აქვს. ამბობს, რომ მთავარი საკითხი, უნივერსიტეტისთვის ავტორიზაციის გავლაა.
,,ახალ ამპლუაში მუშაობას ხვალიდან შევუდგები. მაქვს კონკრეტული გეგმებიც. მათ შორისაა სასწავლებლის როგორც სამაგისტრო, ისე საბაკალავრო პროგრამების აკრედიტაცია, შრომის ბაზრის კვლევა და შედეგების მიხედვით, ახალი პროგრამების შექმნა. ასევე მნიშვნელოვანია, სტუდენტების დასაქმების ხელშეწყობა,“ - აცხადებს ჭიჭილეიშვილი.
იგი განათლების, ჰუმანიტარულ მეცნიერებათა ფაკულტეტის დეკანი იყო. ეწევა სამეცნიერო და პედაგოგიურ მოღვაწეობას ხელოვნებათმცოდნეობის მიმართულებით.
აღსანიშნავია ის გარემოებაც, რომ მას ამ თანამდებობაზე კონკურენტი არ ჰყავდა. საბჭოს 6 წევრიანმა შემადგენლობამ კი, მას მხარი სრულად დაუჭირა. მაია ჭიჭილეიშვილი ბათუმის ხელოვნების სახელმწიფო უნივერსიტეტს, ოთხი წლის განმავლობაში უხელმძღვანელებს.