18, მარტი 2019 20:59:00
ზარ - ზეიმით დაწყებული მშენებლობა ქობულეთში, რომლის დასრულებამდე პროცესით უკვე სუსი დაინტერსდა. რატომ გადასცეს ადგილი ინვესტორს ზღვისპირა ზოლში, სადაც 5 ვარსკვლავიანი სასტუმრო უნდა აშენდეს? მირიან ქათამაძე ჩვენს კითხვებს უპასუხოდ ტოვებს. ის ვინც კონტაქტზე გამოდის, ამბობს, რომ ინფორმაციას არ ფლობს.
ია, ქობულეთში 5-ვარსკვლავიანი სასტუმროს მშენებლობას საფუძველი საზეიმო ვითარებაში გასული წლის 21 აგვისტოს ჩაეყარა. პროექტის მიხედვით, ზღვის სანაპიროზე კომპლექსი მრავალფდუქციური უნდა იყოს. ვიდრე სამშენებლო პროცესი დასრულდება, ტერიტორიის გასხვისების მიზნობრიობა საგამოძიებო ორგანოს შესწავლის საგანი უკვე გახდა. სახელმწიფო უსაფრთხოების სამსახური არკვევს რა პირობებში გადასცეს ინვესტორს ადგილი. ირკვევა, რომ საქმეში ქობულეთის მუნიციპალიტეტის მერია ფიგურირებს. სახელმწიფო უსაფრთხოების სასმახურში არ აკონკრეტებენ პროცესში რა კუთხით არის ჩართული მუნიციპალიტეტის მერია. აქ ისიც არ გვითხრეს გამოძიების ფარგლებში დაიბარეს თუ არა მერიის მაღალჩინოსნები დაკითხვაზე. არაერთი მცდელობის მიუხედავად, ქობულეთის მერმა ჩვენს სატელეფონო ზარებს დღეს არ უპასუხა. შეტყობინებით გვაცნობა, რომ მოგვიანებით თავად დაგვიკავშირდება.
ქობულეთის საკრებულოს ოპოზიცია ეჭვობს, რომ მოხდა ფულის გათეთრება და კორუფციული გარიგებები. ნაციონალური მოძრაობის ინფორმაციით, გამომძიებლებმა დოკუმენტაცია უწყებიდან ორი კვირის წინ სასამართლოს განჩინების საფუძველზე გაიტანეს.
რატომ დაინტერესდა სუსი სანაპირო ზოლში მიწის გასხვისების საკითხით ქობულეთის მაჟორიტარმა არ იცის. უმაღლესი საბჭოს დეპუტატს არც იმის შესახებ ჰქონდა ინფორმაცია რომელ ტერიტორიაზე იყო საუბარი. გიორგი რომანაძე დაგვპირდა, რომ საქმის დეტალებს აუცილებლად მოიკითხავს.
აჭარის უმაღლესი საბჭოს დეპუტატისგან განსხვავებით ინფორმაციას ფლობდა რეგიონის პირველი პირი, რომელმაც განაცხადა, რომ სუსი აღნიშნულის გარდა, აჭარაში კიდევ რამდენიმე საგამოძიებო მოქმედებას ატარებს. თორნიკე რიჟვაძის თქმით, თუ არსებობს კითხვა ნებისმიერ საჯარო მოხელესთან დაკავშირებით ამ კითხვებს უნდა გაეცეს პასუხი. გვარწმუნებს, რომ იმ შემთხვევაში თუ გამოიკვეთება დანაშაულის ნიშნები, ყველა მიეცემა პასუხისგებაში.
ქობულეთში, 40 000 კვ.მ- ტერიტორია მრავალფუქციური სასტუმროს მშენებლობისთვის აჭარის მთავრობის ყოფილი თავჯდომარის ზურაბ პატარაძის მმართველობის დროს გამოიყო. Crystal Building -ის მენეჯმენტში კომენტარი დღეს არ გაკეთდა. აქ გვითხრეს, რომ განმარტებებისთვის მოგვიანებით დაგვიკავშირდებიან. პასუხი ვერც აჭარის ფინანსთა და ეკონომიკის სამინისტროსგან მივიღეთ, რომელიც მიწის გასხვისების პროცესში მონაწილეობდა.