ბათუმში მდებარე ღამის კლუბებში სამართალდარღვევის ფაქტები გამოვლინდა: ინდივიდუალური მეწარმე „აბდულლაჰ აქგიულ“-ის კუთვნილ ღამის კლუბში შემოსავლების სამსახურის თანამშრომელთა მიერ ჩატარდა საკონტროლო შესყიდვა და შეძენილ იქნა ალკოჰოლური სასმელი და საკვები, ჯამურად 100 აშშ დოლარი და 150 ლარი იქნა გადახდილი. საქართველოს ტერიტორიაზე მიმოქცევაში არსებული ეროვნული ვალუტის გამოყენების წესების დარღვევის ფაქტზე, საქართველოს საგადასახადო კოდექსის 1531-ე მუხლის 1-ლი ნაწილის შესაბამისად, მეწარმეს შეეფარდა ფულადი ჯარიმა 200 ლარის ოდენობით. ასევე, მომხმარებელთან ნაღდი ფულადი ანგარიშსწორების დროს, არ იქნა გამოყენებული საკონტროლო-სალარო აპარატი, რის შედეგადაც საქართველოს საგადასახადო კოდექსის 281-ე მუხლის მე-3 ნაწილის შესაბამისად,მეწარმეს სანქციის სახით შეეფარდა ფულადი ჯარიმა 200 ლარი. ი/მ „აბდულლაჰ აქგიულ“-ის ობიექტში, ასევე, განხორციელდა სასაქონლო-მატერიალურ ფასეულობების ცალკეულ სახეობათა მიხედვით შერჩევითი ინვენტარიზაცია ალკოჰოლურ სასმელზე, რის შედეგადაც სააღრიცხვო დოკუმენტაციაში აღურიცხველი და პირველადი საგადასახადო დოკუმენტის გარეშე, დაახლოებით, 5 390 ლარის ღირებულების საქონელი გამოვლინდა, რაზეც საქართველოს საგადასახადო კოდექსის 286-ე მუხლის მე-4 ნაწილის შესაბამისად, ინდივიდუალურ მეწარმეს შეეფარდა აღურიცხველი სასაქონლო-მატერიალურ ფასეულობების საბაზრო ღირებულების 50 პროცენტის - 2 695 ლარის ოდენობის ფულადი ჯარიმა. მეორე შემთხვევაში, კი საკონტროლო შესყიდვა ჩატარდა შეზღუდული პასუხისმგებლობის საზოგადოება „ჰსკ“-ის კუთვნილ ობიექტში. სამართალდარღვევათა გამოვლენის სამმართველოს თანამშრომლებმა შეიძინეს სასმელები და საკვები. ჯამურად გადახდილ იქნა 100 აშშ დოლარი და 300 ლარი. საქართველოს ტერიტორიაზე მიმოქცევაში არსებული ეროვნული ვალუტის გამოყენების წესების დარღვევის ფაქტზე, საქართველს საგადასახადო კოდექსის 1531-ე მუხლის 1-ლი ნაწილის შესაბამისად, შედგა ადმინისტრაციული სამართალდარღვევის ოქმი და მეწარმეს სანქციის სახით შეეფარდა ფულადი ჯარიმა 200 ლარის ოდენობით. მომხმარებელთან ნაღდი ფულადი ანგარიშსწორების მონაცემები აღრიცხულ იქნა საკონტროლო-სალარო აპარატის მეშვეობით, თუმცა ჩეკში ნაჩვენები იქნა ფაქტობრივად გადახდილზე ნაკლები თანხა, რაზეც მეწარმეს სანქციის სახით შეეფარდა ფულადი ჯარიმა 200 ლარის ოდენობით. ობიექტში საცალო ვაჭრობისას ფასის მაჩვენებლები მომხმარებელთათვის თვალსაჩინო ადგილას არ იყო განთავსებული და მეწარმეს სანქციის სახით, შეეფარდა ფულადი ჯარიმა 100 ლარის ოდენობით. შპს „ჰსკ“-ის ობიექტში ასევე განხორციელდა სასაქონლო-მატერიალურ ფასეულობების ცალკეულ სახეობათა მიხედვით შერჩევითი ინვენტარიზაცია ალკოჰოლურ და არაალკოჰოლურ სასმელზე. შედეგად, გამოვლენილ იქნა სააღრიცხვო დოკუმენტაციაში აღურიცხველი და პირველადი საგადასახადო დოკუმენტის გარეშე 1180 ლარის ღირებულების საქონელი, რაზეც საქართველოს საგადასახადო კოდექსის 286-ე მუხლის მე-4 ნაწილის შესაბამისად, მეწარმეს 590 ლარის ოდენობის ფულადი ჯარიმა შეეფარდა.ასევე ინდივიდუალური მეწარმე „ტურაჩ დარგალი“-ის კუთვნილ ობიექტზე განხორციელებული საკონტროლო შესყიდვისას, შეძენილ იქნა ალკოჰოლური სასმელი და საკვები, ჯამურად გადახდილ იქნა 75 აშშ დოლარი. საქართველოს ტერიტორიაზე მიმოქცევაში არსებული ეროვნული ვალუტის გამოყენების წესების დარღვევის ფაქტზე საქართველოს საგადასახადო კოდექსის 1531-ე მუხლის 1-ლი ნაწილის შესაბამისად, შედგენილ იქნა ადმინისტრაციული სამართალდარღვევის ოქმი, მეწარმეს სანქციის სახით შეეფარდა ფულადი ჯარიმა 200 ლარის ოდენობით. მომხმარებელთან ნაღდი ფულადი ანგარიშსწორების დროს არ იქნა გამოყენებული საკონტროლო-სალარო აპარატი, რის გამოც მეწარმეს 200 ლარის ოდენობით შეეფარდა. ობიექტში საკონტროლო-სალარო აპარატის ფაქტობრივად განთავსების მისამართი არ ემთხვეოდა საკონტროლო-სალარო აპარატის რეგისტრაციის მისამართს, რაზეც საქართველოს საგადასახადო კოდექსის 291-ე მუხლის შესაბამისად, შედგენილ იქნა საგადასახადო სამართალდარღვევის ოქმი, მეწარმეს სანქციის სახით შეეფარდა ფულადი ჯარიმა 100 ლარის ოდენობით. სამივე შემთხვევაში, საკონტროლო შესყიდვით შეძენილი საქონლისა და მომსახურების ღირებულება ფაქტობრივად გადახდილ ფასზე გაცილებით ნაკლები აღმოჩნდა.არცერთ ობიექტში მენიუ არ იყო წარმოდგენილი ქართულ ენაზე, მენიუ შემოთავაზებულ იყო მხოლოდ ინგლისურად გაურკვეველი სახის პროდუქტისა და ფასის ჩამონათვალით, შეკვეთილი პროდუქტის ნაწილი საერთოდ არ იყო შეტანილი მენიუში, შუალედური ანგარიშის ქვითარი წარმოდგენილი იყო უცხოურ ენაზე. საქმეზე მოკლევა გრძელდება.
47
s
s
s