01, ივნისი 2019 22:37:00
ბათუმში დაკავებულ მაღალჩინოსნებს, რამდენიმე წუთის წინათ ბათუმის საქალაქო სასამართლოში წინასწარი ორთვიანი პატიმრობა შეუფარდეს. მოსამართლე ლევან გელოვანმა დაცვის მხარის შუამდგომლობა გირაოს შეფარდების თაობაზე არ დააკმაყოფილა. სასამართლო სხდომა თითქმის მთელი დღის განმავლობაში გრძელდებოდა. პროკურორის მტკიცებით, თუ სასამართლო აღკვეთის ღონისძიების სახით პატიმრობას არ გამოიყენებდა, ბრალდებულების მიმალვის და მტკიცებულებების გაქრობის საფრთხე არსებობდა. შეგახსენებთ, რომ ორი დღის წინათ ბათუმში 7 მაღალჩინოსანი, სახელმწიფო თანხის გაფლანგვისა და სამსახურეობრივი უფლებამოსილების ბოროტად გამოყენების ბრალდებით დააკავეს. დაკავებულები თავს უდანაშაულოდ მიიჩნევენ, რაც დღევანდელ პროცესზეც განაცხადეს.