04, ივნისი 2019 11:11:00
სახელმწიფო ინსპექტორის პოზიციაზე საკონკურსო კომისიამ პრემიერ-მინისტრს სახელმწიფო ორი კანდიდატი ვალერი ლომუაშვილი და ლონდა თოლორაია წარუდგინა. ლონდა თოლორაია შინაგან საქმეთა სამინისტროს ადამიანის უფლებათა დაცვის დეპარტამენტის დირექტორია, ხოლო ვალერი ლომუაშვილი შინაგან საქმეთა სამინისტროს კვლევის და განვითარების დეპარტამენტის ყოფილი დირექტორი. სახელმწიფო ინსპექტორის თანამდებობის დასაკავებლად კანდიდატების შერჩევის მიზნით, საქართველოს მთავრობის ადმინისტრაციაში სახელმწიფო ინსპექტორის შესარჩევი საკონკურსო კომისია 23 აპრილს შეიქმნა. კომისიის შემადგენლობაში შედიოდნენ საქართველოს მთავრობის, საქართველოს პარლამენტის, საქართველოს უზენაესი სასამართლოს, არასამთავრობო სექტორისა და სახალხო დამცველის წარმომადგენლები. კანდიდატის შესარჩევად ღია კონკურსი 2019 წლის 17 მაისს გამოცხადდა. კონკურსში განაცხადი 48 პირს ჰქონდა გაკეთებული. ამ დრომდე სახელმწიფო ინსპექტორის თანამდებობას თამარ ქალდანი იკავებდა.
სახელმწიფო ინსპექტორის სამსახურის შესახებ ინფორმაცია იხილეთ: https://matsne.gov.ge/ka/document/view/4276790?publication=3