10, ივნისი 2019 15:33:00
განათლების სამინისტრომ სახელმძღვანელოების ბეჭდვაზე ტენდერი გამოაცხადა. 7 მილიონ 790 239 ათასი ლარი დაიხარჯება I-VI კლასის 1 817 800 წიგნსა და რვეულზე, ასევე, VIII-XII კლასის 355 160 წიგნსა და სასკოლო რვეულზე. სამინისტროს ინფორმაციით, ახალი სასწავლო წლისთვის განახლებული სახელმძღვანელოები დაიბეჭდება მეშვიდეკლასელებისთვისაც, VIII-XII კლასელები კი ისევ ძველი სახელმძღვანელოებით ისწავლიან. 2019 წელს ახალი სახელმძღვანელოები არაქართულენოვანი სკოლებისთვისაც დაიბეჭდება. ახალი სახელმძღვანელოები არაქართულენოვან სკოლებს პირველიდან მეექვსე კლასის ჩათვლით მიეწოდება. ეს ახალი ეროვნული გეგმით გათვალისწინებული სახელმძღვანელოები იქნება. წიგნები სომხურ, აზერბაიჯანულ და რუსულ ენებზე დაიბეჭდა. განახლებული იქნება ქართული ენისა და ლიტერატურის სახელმძღვანელოებიც. „სამოქალაქო ინტეგრაციისა და ეროვნებათშორისი ურთიერთობების ცენტრის“ ინფორმაციით, 2013 წლის კვლევების მიხედვით, საქართველოში 213 არაქართულენოვანი სკოლა და 77 სექტორია. აქედან 85 სკოლა მთლიანად აზერბაიჯანულენოვანია, 11 – რუსულენოვანი, 117 კი – სომხურენოვანი. ამ სკოლებში, 2014 წლის მონაცემებით, 60 ათასამდე მოსწავლე სწავლობს. განახლებული სახელმძღვანელოები არაქართულენოვან სკოლებში გასულ წელს უნდა შესულიყო, თუმცა ტენდერი ჩაიშალა.