ეკონომიკისა და მდგრადი განვითარების სამინისტროს სსიპ სახელმწიფო ქონების ეროვნული სააგენტოს ინფორმაციით, მიმდინარე წლის 5 თვის განმავლობაში არც ერთი სახელმწიფოს საკუთრებაში არსებული საწარმოს პრივატიზება არ მომხდარა.
როგორც უწყებაში განმარტავენ, სახელმწიფო საწარმოს პრივატიზების მიზნით 5 თვეში მხოლოდ ერთი აუქციონი გამოცხადდა, თუმცა მონაწილეების არარსებობის გამო აუქციონი არ შედგა.
„2019 წლის 13 მარტის ბრძანების საფუძველზე გამოცხადდა ელექტრონული აუქციონი შპს ,,საქსპეცტრანსის“ სახელმწიფო საკუთრებაში არსებული 100%- იანი წილის უპირობო პრივატიზების მიზნით. მონაწილე პირების არ არსებობის გამო ზემოხსენებული აუქციონი არ შედგა,“ - აცხადებენ ქონების ეროვნულ სააგენტოში.
ამჟამად სსიპ სახელმწიფო ქონების ეროვნული სააგენტოს მართვაშია 97 სახელმწიფოს წილობრივი მონაწილეობით დაფუძნებული საწარმო, რომელთაც 2018 წელი 19.6 მილიონ ლარიანი მოგებით დაასრულეს.
რაც შეეხება საპრივატიზებო გეგმას, ეკონომიკისა და მდგრადი განვითარების ყოფილი მინისტრი აცხადებდა, რომ წელს ჯამში 170 მილიონი ლარის სახელმწიფო ქონების პრივატიზება მოხდებოდა, აქედან 30 მილიონი ლარი მიღებას კი სახელმწიფო საწარმოების პრივატიზებით აანონსებდა.
მოქმედი მინისტრის, ნათია თურნავას განცხადებით კი, წელს გეგმით გათვალისწინებულია 70 მლნ ლარი, თუმცა შესაძლებელია საპრივატიზაციო ქონების 100 მლნ ლარამდე გაზრდა.
როგორც ეკონომიკისა და მდგრადი განვითარების მინისტრმა ნათია თურნავამ განაცხადა, ზუსტად ლარებსა და თეთრებში იმის თქმა, რა ღირებულების ქონების პრივატიზება მოხდება, არასერიოზულია, რადგან გასაყიდი ქონების ღირებულება სხვადასხვა ფაქტორებზეა დამოკიდებული. ამასთან, მისივე თქმით, არსებობს საპრივატიზებო ობიექტების ნუსხა, რომელსაც ნებისმიერი მინისტრი გაჰყვებოდა.
2
s
s
s