25, ივნისი 2019 10:19:00
ინგუშეთის ხელმძღვანელი იუნუს-ბეკ ევკუროვი გადადგა. მან ვადამდე გადადგომის მოთხოვნა უკვე გაუგზავნა პრეზიდენტ ვლადიმერ პუტინს. გადადგომის მიზეზად ინგუშეთის მოსახლეობაში დაქსაქსულობა დაასახელა და ამ დაქსაქსულობაში ინგუშეთის ხელისუფლების, რელიგიური და საზოგადოებრივი ორგანიზაციების და კონკრეტულად საკუთარი პასუხისმგებლობაც აღიარა.
იუნუს-ბეკ ევკუროვის გადადგომა გარკვეული მოულოდნელობა გახდა თვით მისი გარემოცვისთვის.
შარშან მან ჩეჩნეთის ხელმძღვანელ რამზან კადიროვთან ერთად ხელი მოაწერა ორი მეზობელი და მოძმე ჩეჩნეთ-ინგუშეთის საზღვრის გამიჯვნას. საზღვრის ორმა მონაკვეთმა ინგუშების სერიოზული წინააღმდეგობა გამოიწვია, კერძოდ, მასობრივი საპროტესტო აქციები.
იუნუს ბეკ-ევკუროვი ინგუშეთს 2008 წლიდან ხელმძღვანელობს, თუმცა ცოტა ხნის წინ ის ხელახლა დაამტკიცეს თანამდებობაზე. მისი უფლებამოსილების ვადა ოთხი წლის შემდეგ, 2023 წელს იწურებოდა. იუნუს ბეკ ევკუროვი ყოფილი სამხედრო მაღალჩინოსანია. 2009 წელს ევკუროვი მასზე განხორციელებულ ტერაქტს გადაურჩა. მისი კორტეჟის გვერდზე ავტომანქანა აფეთქდა, მისი მცველი დაიღუპა, თვითონ კი დაიჭრა.