27, ივნისი 2019 22:15:00
გიორგი გახარიამ დღეს ჟურნალისტებთან გამართულ შეხვედრაზე აღნიშნა,რომ 20 ივნისის ღამეს ხელისუფლების წარმომადგენლები ოპოზიციასთან მოლაპარაკებას ცდილობდნენ და მათი მიზანი სპეციალური საშუალებების გამოყენება არ იყო.
„ტემპერატურა მაღალი იყო და პროცესის მართვა იყო უკიდურესად რთული. ყველა შესაძლებლობა და მზაობაც იყო იმისთვის, რომ არ მომხდარიყო პროცესის დეესკალაცია ძალადობრივ კონტექსტში. იყო რამდენიმე ძალადობრივი შტურმი, რომლის დროსაც ჩვენ მაქსიმალურად ვცდილობდით სპეციალური საშუალებების გამოყენებამდე საქმე არ მისულიყო“,- განაცხადა შინაგან საქმეთა მინისტრმა.
მინისტრის მტკიცებით 20 ივნისს ხელისუფლების ძალადობრივად ხელში ჩაგდების მცდელობას ჰქონდა ადგილი.
„ეს იყო მშვიდობიანი აქცია 22:00 საათამდე. ადამიანები პირდაპირ გვეუბნებოდნენ, რომ ამ პოლიტიკური მოთხოვნის შესრულების ან არ შესრულების პირობებში, ჩვენ არ უნდა ვიდგეთ აქ, ჩვენ უნდა შევიდეთ პარლამენტში, რასაც შემდგომ მოჰყვა როგორც ვიზუალურად, ასევე ვერბალურად მოწოდება გარკვეული ჯგუფების მიმართ, რომლებმაც ორგანიზებულად მიიტანეს შტურმი პოლიციაზე პარლამენტში შეჭრის მიზნით“,- განაცხადა გახარიამ.