საქართველოს ენერგეტიკულ სისტემაში მიმდინარე წლის მარტის მდგომარეობით, 93 ელექტროსადგურია ჩართული, რომელთა ჯამური დადგმული სიმძლავრე 4207.17 მგვტ-ია.
ეკონომიკისა და მდგრადი განვითარების სამინისტროს ცნობით, 93 ელექტროსადგურიდან 87 ჰიდროელექტროსადგურია , 5 თბოელექტროსადგური და 1 ქარის ელექტროსადგური.
არსებული ელექტროსადგურებიდან ერთი - „შუახევი ჰესი“, დადგმული სიმძლავრით - 178.72 მგვტ, დროებით გაჩერებულია გვირაბში მიმდინარე სარემონტო სამუშაოების გამო.
კითხვაზე, რამდენი კვტ.სთ ელექტროენერგიის გამომუშავება შეუძლიათ არსებულ ჰიდროელექტროსადგურებს ერთი წლის განმავლობაში, ეკონომიკის სამინისტროში განმარტავენ, რომ 2018 წელს მოქმედი 86 ელექტროსადგურის ჯამურმა წარმოებამ 12148.55 მლნ. კვტ.სთ შეადგინა. მათ შორის: 80 ჰიდროელექტროსადგურის მიერ გამომუშავებული იქნა 9949.35 მლნ. კვტ.სთ, 5 თბოელექტროსადგურის მიერ - 2114.93 მლნ. კვტ.სთ და 1 ქარის ელექტროსადგურის მიერ - 84.28 მლნ. კვტ.სთ ელექტროენერგია.
უწყების განცხადებით, აღნიშნული მონაცემები ცხადყოფს, რომ დღეს არსებულ ჰიდროელექტროსადგურებს არ აქვთ საკმარისი გამომუშავება გაზრდილი მოთხოვნის დასაკმაყოფილებლად და ახალი ჰიდროსადგურების მშენებლობის გარეშე გაიზრდება დისბალანსი ელექტროენერგიის მოხმარებასა და გამომუშავებას შორის, რაც იმპორტით უნდა დაბალანსდეს.
„საქართველოზე კომერციული და საყოფაცხოვრებო მოთხოვნის ზრდის შედეგად მოხმარება ყოველწლიურად საშუალოდ 5%-ით იზრდება.
არსებობს არაერთი კვლევა, რომლებიც ადასტურებენ, რომ 2030 წელს საქართველოს ელექტროენერგიის მოთხოვნა 21-22 მილიარდ კვტ/საათს მიაღწევს, რაც დაახლოებით 9-10 მილიარდი კტვ/სთ-ით მეტია ქვეყნის არსებულ გენერაციაზე. პესიმისტური გათვლებითაც კი 2030 წელს - ჯამური მოთხოვნა 18 მილიარდ კილოვატ საათამდე გაიზრდება, რაც 6 მილიარდი კვ/სთ-ით მეტია დღეისთვის არსებულ გენერაციაზე,“ - აცხადებენ ეკონომიკისა და მდგრადი განვითარების სამინისტროში.
10
s
s
s