ხულოში ლიტერატურული კონკურსი „პეგასი" გაიმართება, რომლის ფარგლებშიც მონაწილეები წარმოადგენენ ადგილზე შექმნილ ნაწარმოებებს პროზასა და პოეზიაში.

პირველი ტური დაგეგმილია 26 ივლისს.

კონკურსის მონაწილეები გაივლიან ხულო-თაგო-სხალთის საფეხმალო ბილიკს, სადაც მიღებულ შთაბეჭდილებებს გადაიტანენ ფურცელზე.

შექმნილ ნაწარმოებს სელიმ ხიმშიაშვილის სახლ-მუზეუმში სპეციალურად მოწვეული ჟიური შეაფასებს.

პირველ ტურში შეირჩევა 10 საუკეთესო ავტორი, რომელებიც 30 ივლისს გაემგზავრებიან ხიხანის ციხეზე, სადაც გაიმართება კონკურსის მეორე ტური. მეორე ტურში კონკურსის მონაწილეები წინასწარ შერჩეულ თემატიკაზე დაწერენ ნაწარმოებებს. გამარჯვებულებს გადაეცემათ სპეციალური პრიზები.

 კონკურსში მონაწილეობის მიღება შეუძლიათ 16-დან 25 წლის ჩათვლით ახალგაზრდებს.

მონაწილეობის მსურველებმა რეგისტრაცია უნდა გაიარონ ხულოს საჯარო ბიბლიოთეკის სამკითხველო დარბაზში 26 ივლისს 10 საათიდან 12 საათამდე.

 პროექტის მიზანია დამწყები შემოქმედების გამოვლენა და მათ შესახებ ცნობადობის გაზრდა, ასევე, ტურიზმის განვითარების ხელშეწყობა ხულოს მუნიციპალიტეტში.

 პროექტის მხარდამჭერები არიან ხულოს მუნიციპალიტეტის მერია და „IRE PALACE GODERDZI”.