გერმანიის საზოგადოებრივი ტელევიზიის პირველ არხზე გავიდა აფხაზეთში გადაღებული სიუჟეტი, სადაც ნათქვამია, რომ აფხაზეთი საქართველოს სტალინმა მიუერთა.
სიუჟეტში მოთხრობილია, თუ რა მდგომარეობაში ცხოვრობენ ტყვარჩელსა და გალში ადამიანები. ჟურნალისტი ამბობს, რომ რუსეთი აფხაზეთის ერთადერთი ახლო მეგობარია და აფხაზეთში საქართველოსთან ყოფნა ვერ წარმოუდგენიათ. ჟურნალისტის თქმით, აფხაზეთში ცხოვრობდა საბჭოთა დიქტატორი სტალინი, რომელმაც რიწის ტბაზე მდებარე რეზიდენციაში მიღო მძიმე გადაწყვეტილება - აფხაზეთი მიეკუთვნა საქართველოს. ასევე საუბარია, რომ საბჭოთა კავშირის დაშლას სისხლისმღვრელი ომი მოჰყვა, რომლის დროსაც დაიღუპა 10 ათასი ადამიანი. აფხაზეთმა მოგვიანებით დამოუკიდებლობა გამოაცხადა, ქართულმა მოსახლეობამ კი ნაჩქარევად დატოვა თავიანთი სახლები, რომელთა დიდი ნაწილი დღეს ცარიელია. ქართველები მხოლოდ გალის რაიონში დაბრუნდნენ. შემდეგ, სიუჟეტის გმირები ნუკრი პაპავა და ლეილა გოგოხია საუბრობენ პრობლემებზე, რომელსაც ისინი გალში ცხოვრებისას აწყდებიან.
„საბჭოთა წარსულის კვლევის ლაბორატორიის” დამფუძნებელმა ლაშა ბაქრაძემ „ლაივპრესს“ უთხრა, რომ ამ სიუჟეტის გამო, ტელევიზიას წერილით უნდა მიმართონ საგარეო საქმეთა სამინისტრომ, ან საქართველოს საელჩომ გერმანიაში.
„სიუჟეტში რაიმე მტრული განწყობები არ ჩანს საქართველოს მიმართ. აქ საუბარია იმაზე, რომ აფხაზეთს ვერ წარმოუდგენია საქართველოსთან ერთად ცხოვრება, რაც სამწუხაროდ, მართლაც ასეა. აქ ასევე ნაჩვენებია გალში მცხოვრები ქართველების ცხოვრება, როგორც მეორეხარისხოვანი მოქალაქეების. გადაცემა განმეორებით უნდა გავიდეს ეთერში და საქართველოს საგარეო საქმეთა სამინისტრომ, ან გერმანიაში საქართველო საელჩომ უნდა მიმართოს ტელევიზიას წერილით და გადაცემის გასვლამდე აუხსნან მაყურებელს, რომ ინფორმაცია, თითქოს აფხაზეთი სტალინმა მიუერთა საქართველოს, არის შეცდომა“, - ამბობს ლაშა ბაქრაძე.
ექსპერტი ამბობს, რომ ტელევიზიით გასული არასწორი ინფორმაციიის გამო, დამნაშავე უცხოელი ჟურნალისტი არ არის.
„ბევრმა გერმანიაში მცხოვრებმა ქართველმა მომმართა, მკითხა როგორ დავუპირისპირდეთ ჩვენ ამას, რა არგუმენტებით გავამყაროთ ჩვენი ხედვა და სწორედ ამიტომ დავწერე სტატუსი ფეისბუკზე, სადაც ჩამოვთვალე რამდენიმე ლინკი, რითაც მარტივად, სწორი ინფორმაციის მიწოდება იქნება შესაძლებელი. ძალიან ხშირად ვიყენებთ შუა საუკუნეების ინფორმაციას, რაც ძალიან ბევრს აბნევს. უცხოელები არ არიან დამნაშავე, რომ საქართველოს ისტორიის შესახებ არ აქვთ სწორი ინფორმაცია, ჩვენ უნდა შევთავაზოთ ჩვენი ინფორმაცია. ეს არა მხოლოდ ამ ხელისუფლებას, არამედ, ყველა ხელისუფლებას ეხება. ჩვენ ამ ომს უკვე წლებია ვაგებთ “, - ამბობს მკვლევარი.
მისივე თქმით, რუსული დეზინფორმაციის წინააღმდეგ მინიმუმიც კი არ კეთდება. მაგალითად, საგარეო საქმეთა სამინისტროს ვებ გვერდზე შესაძლებელია განთავსდეს ისტორიული დოკუმენტები, რომელიც სწორ ინფორმაციას მისცემს უცხოელ ჟურნალისტს, თუ ყველა დაინტერესებულ პირს.
„ინფორმაცია, რომ აფხაზეთი იყო დამოუკიდებელი და ის სტალინმა მიუერთა საქართველოს, ეს არის აფხაზეთის ილუზია. მათაც ასე ასწავლიან და უცხოეთშიც ასე ვრცელდება. ძირითადად, უცხოეთში ამბები ვრცელდება მოსკოვის თვალით დანახული ინფორმაციის მიხედვით. ხშირად გაიგებთ, რომ საერთაშორისო ორგანიზაციები აღიარებენ საქართველოს ტერიტორიულ მთლიანობას. მაგრამ სამწუხაროდ, ეს საკმარისი არ არის. უკეთესად უნდა ვიყოთ ორგანიზებულები, საზოგადოებაც და სახელმწიფოც. მინიმუმ, რაც შეიძლება გაკეთდეს ის არის, რომ ინფორმაცია მარტივად ხელმისაწვდომი იყოს საგარეო საქმეთა სამინისტროს ვებ გვერდზე“, - ამბობს ლაშა ბაქრაძე.
გერმანული ტელევიზიით აფხაზეთზე სიუჟეტის გასვლის შესახებ მან ფეისბუკზე დაწერა და იქვე მიუთითა რამდენიმე ბმული, რომელიც ოფიციალურმა უწყებებმა უნდა გამოიყენონ საპასუხო წერილის მომზადებისას.
საგარეო საქმეთა სამინისტროში „ლაივპრესს“ უთხრეს, რომ გერმანული ტელევიზიით გასული სიუჟეტის შესახებ მოგვიანებით გააკეთებენ განცხადებას.
319
s
s
s