19, აპრილი 2017 17:00:00
ბათუმში ,,მსოფლიოს საუკეთესო პრინცის და პრინცესის“ კონკურსი მიმდინარეობს. 16 სხვადასხვა ქვეყნიდან ბათუმს ოცდათხუთმეტი 4 დან 14 წლის სხვადასხვა ასაკობრივი ჯგუფის კონკურსების გამარჯვებულები ეწვივნენ. მათთან ერთად არიან საერთაშორისო ჟიურის წევრები. პროექტის მონაწილეები სასტუმრო ,,ეუფორიაში“ არიან დაბინავებულები. სამოდელო სააგენტო ,,კატრინის“ დამფუძნებლის და თათრეთის რესპუბლიკის საბავშვო საზოგადოებრივი ორგანიზაციის დამფუძნებლის ხელმძღვანელობით, კონკურსის ფარგლებში, 8 დღის განმავლობაში სხვადასხვა ტურები გაიმართება, ჩატარდება ნაციონალური სამოსის წარმოდგენის, ტალანტისა და ეკოპროექტების ტურები. მონაწილეებმა თავიანთი ქვეყნებიდან სხვადასხვა სახეობის მცენარეები ჩამოიტანეს, რომლებიც ბათუმის ბულვარში აჭარის მთავრობის თავმჯდომარის მეუღლესთან ერთად დარგეს. პროექტის ფინალური ტური 22 აპრილს ბათუმის სახელმწიფო მუსიკალურ ცენტრში გაიმართება, სადაც ყველა მონაწილე დაჯილდოვდება.