კომუნიკაციების ეროვნული კომისიის და განათლების, მეცნიერების, კულტურის და სპორტის სამინისტროს თანამშრომლობით, „Happy Onlife“-ის სამაგიდო თამაშით სწავლა საქართველოს სკოლებში დაინერგება. თამაში გათვლილია, როგორც დაწყებითი, ასევე უფროსი კლასის მოსწავლეებისთვის. პირველ ეტაპზე „Happy Onlife”-ით ათამდე სკოლაში შეძლებენ სწავლას, თუმცა ონლაინ აპლიკაცია, რომელიც კომუნიკაციების კომისიამ ქართულ ენაზე თარგმნა უკვე ყველა მსურველისთვის ხელმისაწვდომია.
„Happy Onlife“ მედიაწიგნიერების განვითარებისა და ხელშეწყობისთვის ევროკავშირის 8 ქვეყანაში ერთ-ერთ ყველაზე წარმატებულ პროექტად აღიარებული ონლაინ აპლიკაცია და სამაგიდო თამაშია, კომუნიკაციების კომისიამ მისი ადაპტირებული ვერსია შექმნა და ქართულ ენაზე თარგმნა.
„ბავშვებს, მშობლებსა და მასწავლებლებს უკვე შეუძლიათ აპლიკაციის საშუალებით, გაეცნონ ციფრული მედიის უსაფრთხოდ გამოყენების წესებს. აპლიკაციის მიზანია, ბავშვებმა და მოზარდებმა თამაშით ისწავლონ ონლაინ კონტენტის კრიტიკული შეფასება და ანალიზი. ამავდროულად “Happy Onlife“ ხელს უწყობს მშობლებსა და მასწავლებლებს აქტიურად იზრუნონ ბავშვების მედიაწიგნიერების უნარ-ჩვევების განვითარებაზე და დაიცვას ისინი კიბერბულინგისგან“,- აცხადებენ კომუნიკაციების კომისიაში.
2018 წელს კომუნიკაციების კომისიას საქართველოს კანონით მედიაწიგნიერების განვითარებისა და ხელშეწყობის ფუნქცია დაეკისრა. უწყება განათლების სამინისტროსთან ერთად, 2019 წელს მოზარდებისთვის, მშობლებისა და მასწავლებლების ჩართულობით, მედიაწიგნიერების განვითარებისა და ხელშეწყობის მიზნით, 5 სხვადასხვა პროექტს ახორციელებს.
5
s
s
s