29, დეკემბერი 2019 16:47:00
სახელმწიფო აუდიტის სამსახურმა ხელვაჩაურის მუნიციპალიტეტის 2018 წლის ბიუჯეტით გათვალისწინებული პროგრამების შესაბამისობის აუდიტი ჩაატარა. შედეგად შემდეგი დარღვევა-ნაკლოვანებები გამოვლინდა:
ხელვაჩაურის მუნიციპალიტეტის მერის ბრძანებით სამსახურებრივი მოვალეობის შესრულებისთვის დაწესებულია საწვავის ლიმიტები, როგორც მუნიციპალიტეტის ბალანსზე რიცხულ, ასევე თანამშრომელთა მფლობელობაში არსებულ ავტომანქანებზე.
გარემოება 1: მერიის ფინანსური ანგარიშგების მიხედვით, 2018 წლის 31 დეკემბრის მდგომარეობით, ბალანსზე რიცხული ავტოსატრანსპორტო საშუალებების რაოდენობა შეადგენს 15 ერთეულს, რომლებზედაც დადგენილია საწვავის ლიმიტები.
გარდა აღნიშნული ავტოსატრანსპორტო საშუალებებისა, მერია წლის განმავლობაში სარგებლობდა 35 ერთეული ავტოსატრანსპორტო საშუალებით, რომლებიც იმყოფებოდნენ მერიის საჯარო მოსამსახურეების პირად საკუთრებაში/მფლობელობაში.
მუნიციპალიტეტს არ აქვს მიღებული მუნიციპალური ავტოპარკის გადანაწილების, კლასიფიკაციისა და სამსახურებრივი ავტომანქანის შესყიდვის წესი.
მართალია, მთავრობის დადგენილება სარეკომენდაციო ხასიათისაა, თუმცა მისი გათვალისწინება ხელს შეუწყობდა ავტოპარკის ოპტიმიზაციას, მის ეფექტიან გამოყენებასა და ფულადი სახსრების დაზოგვას. ზემოთ აღნიშნულ ავტოსატრანსპორტო საშუალებებზე გაცემულია 144,677 ლარის ღირებულების 66,319 ლიტრი საწვავი.
მათ შორის: 98,631 ლარის ღირებულების საწვავი გაცემულია მერიის ბალანსზე არსებულ ავტომანქანებზე, ხოლო 46,046 ლარის ღირებულების საწვავი − მერიის საჯარო მოსამსახურეების პირად მფლობელობაში არსებულ ავტომანქანებზე. მუნიციპალიტეტის წარმომადგენლებთან ერთად, აუდიტის ჯგუფმა დაათვალიერა მერიის ბალანსზე რიცხული ავტომანქანები.
გამოვლინდა, რომ 10 სატრანსპორტო საშუალებას მოხსნილი ჰქონდა „აგაი“ სისტემის ჩიპები (მეხსიერების ბარათი). ასევე აუდიტის ობიექტმა ვერ წარმოადგინა საჯარო მოსამსახურეებისათვის გაცემული საწვავის სამსახურებრივი დანიშნულებით გამოყენების დამადასტურებელი დოკუმენტაცია. შესაბამისად, არსებობს საწვავის არამიზნობრივი დანიშნულებით მოხმარების შესაძლებლობა.