17, მარტი 2020 13:25:00
რეპორტაჟს, რომელსაც ახლა შემოგთავაზებთ, ალბათ ბევრი თქვენგანი დიდი ინტერესით ელოდება. უფრო ახლოდან უნდა გაგაცნოთ მოქალაქე, რომელზეც წარმოდგენა სოციალურ ქსელში უკვე გავრცელებული ვიდეოდანაც შეგექმნათ. გოჩა მოწყობილი ქობულეთიდანაა და იგი მაღალი სამოქალაქო თვითშეგნების მაგალითია. მისი სოციალური პასუხიმგებლობა კი იმაში გაიხატა, რომ ქვეყანაში და რეგიონში შექმნილი პანიკის ფონზე, მოწყობილი საკუთარი ბიზნესის მოგების ნაცვლად თანამოქალაქეების კეთილდღეობაზე ფიქრობს.
გოჩა მოწყობილის მაღაზიას ქობულეთში თითქმის ყველა იცნობს. იგი პურის ფქვილით 18 წელია ვაჭრობს. ბოლო ოთხი დღეა, მისთვის გაყიდვების მაჩვენებელმა რეკორდულ რაოდენობას მიაღწია. არც მეტი, არც ნაკლები, იგი დღეში 500 ტომარა ფქვილს ყიდის, როცა სხვა დროს საუკეთესო შემთხვევაში 50-ს არ აღემატებოდა.
პანიკის საფუძველი ესმის, თუმცა ასეთ მოთხოვნას სხვა საფუძველიც აქვს. განსხვავებით სხვა მოვაჭრეებისგან, მან გამორჩეულად გაიზიარა პასუხსიმგებლობა. გარდა იმისა, რომ შემთხვევით არ ისარგებლა და პროდუქტის ღირებულება არ გაზარდა, ადამიანებს ბინაზე მიტანით ემსახურება. საკუთარი ხარჯებით, ფქვილი მიაქვს ყველგან და ყველასთვის, ვისაც სჭირდება და გარეთ გამოსვლის ეშინია. განსაკუთრებით მოხუცებთან.
გოჩა მოწყობილის სამოქალაქო პასუხისმგებლობა გადამდები არ აღმოჩნდა გვერდით მოვაჭრეებისთვის. თუმცა მხარდაჭერისთვის განსაკუთრებით ემადლიერებიან მომხმარებლები. ერთი პირის ერთგვარი აქციის შესახებ მათ სოციალური ქსელით გაიგეს.
კორონავირუსის მიზეზით, ქვეყანაში შექმნილი მდგომარეობის ფონზე, მომსახურების განსაკუთრებული პირობა ერთი მიზეზით აქვს - სურს ამ ფორმით შეიტანოს საკუთარი მცირე წვლილი ადამიანების დასახმარებლად. ვინაიდან, მხოლოდ მაგალითის მიცემა საკმარისი არ აღმოჩნდა, იგი მოუწოდებს მეწარმეებს, გაიზიარონ პასუხსიმგებლობა და რთულ ვითარებაში მყოფ ადამიანებს, ფასების მატებით მდგომარეობა მეტად არ დაუმძიმონ.