კორუფციის რისკები ქობულეთის მუნიციპალიტეტის უკონკურენტო შესყიდვებში - ამ სათაურით კვლევას "საერთაშორისო გამჭვირვალობა საქართველო" ავრცელებს. არასამთავრობო ორგანიზაციის ცნობით, „ჯორჯიან სტოუნი“ ქობულეთის მერიის მიერ გამოცხადებული ინფრასტრუქტურული სამუშაოების ყველაზე მსხვილი მიმწოდებელია. კომპანია ტენდერების უკონკურენტო გამარჯვებულია, იკვეთება მასზე მორგებული პირობების შეთავაზების ფაქტებიც.
ქობულეთში ზღვისპირა პარკის მოწყობის მეორე ეტაპის სამუშაოებს შპს „ჯორჯიან სტოუნი” შეასრულებს. ღირებულება 4,637,636 ლარს ითვლის. მის ერთადერთ კონკურენტს, შპს Award”-ს სატენდერო კომისიამ წარდგენილი დოკუმენტაცია დაუწუნა და იგი ტენდერს დისკვალიფიკაციით გაეთიშა. კონკურენტი კომპანიების დისკვალიფიკაციის ხარჯზე გაიმარჯვა ამავე კომპანიამ „ბათუმის ბულვარის” და კიდევ რამდენიმე შესყიდვაში.
2019 წელს სწორედ, ამ კომპანიამ შეასრულა ქობულეთის ზღვისპირა პარკის მოწყობის პირველი ეტაპის სამუშაოებიც, რისთვისაც მერიამ 2,770,077 ლარი გადაუხადა. „ჯორჯიან სტოუნმა” 2015-2019 წლებში ქობულეთის მუნიციპალიტეტის მიერ გამოცხადებულ 27 ტენდერში გაიმარჯვა, გაუფორმდა გამარტივებული შესყიდვის ერთი ხელშეკრულება და ჯამში 18,809,434 ლარი მიიღო, რომლის 38%-ზე მეტი უკონკურენტო ტენდერებსა და პირდაპირ შესყიდვებზე მოდის. კომპანიამ ბოლო 6 წლის განმავლობაში სამშენებლო მასალების მიწოდებისა და სხვადასხვა ინფრასტრუქტურული სამუშაოსთვის შემსყიდველი ორგანიზაციებიდან ჯამში, 27,031,328 ლარი მიიღო, საიდანაც 70% „ჯორჯიან სტოუნს” ქობულეთის მერიიდან აქვს მიღებული.
ვიდრე ბადრი რომანაძის კომპანიის დირექტორად დაინიშნებოდა, „ჯორჯიან სტოუნმა” მხოლოდ ერთხელ, 2013 მოიგო ბათუმის მერიის 18 ათას ლარიანი შესყიდვა. ქობულეთის მერიის მიერ გამოცხადებული ტენდერების მოგების სერიები კი მისი საჯარო სამსახურიდან წასვლის შემდეგ დაიწყო. სახელმწიფო შესყიდვების სააგენტოს ინფორმაციის ანალიზის მიხედვით,"საერთაშორისო გამჭვირვალობა საქართველო" წერს, რომ ქობულეთის მერია სატენდერო პირობებს სავარაუდოდ არგებს „ჯორჯიან სტოუნის” ინტერესებს, რაც ანტიკორუფციული სამსახურის მოკვლევის საგანი უნდა გახდეს. წარმოდგენილი ცხრილებიდან, ერთ-ერთით ირკვევა, რომ ქობულეთის მერია 7-დან 6 შემთხვევაში „ჯორჯიან სტოუნის” მიერ შეთავაზებული ფასით აფორმებს ხელშეკრულებას.
„ჯორჯიან სტოუნის” დირექტორი ბადრი რომანაძეა. იგი 2011-2014 წლებში ქობულეთის მერიის არქიტექტურის სამსახურის უფროსი იყო. იგი ასევე ქობულეთის ზედამხედველობის სამსახურის უფროსის, მინდია რომანაძისა და ქობულეთის გამწვანების სამსახურის ხელმძღვანელის, ზვიად რომანაძის ნათესავია. მინდია და ზვიად რომანაძეები ძმები არიან. მინდია რომანაძე 2018 წლის მაისში ქობულეთის მერიის ზედამხედველობის სამსახურში სუს-ის ანტიკორუფციული სააგენტოდან მივიდა, 2011-2015 წლებში კი ქობულეთში კახი კალაძის კუთვნილი სასტუმრო „კოლხეთის” დირექტორი იყო.
„საერთაშორისო გამჭვირვალობა საქართველოს“ მიერ მომზადებულ კვლევაში ასევე არის საუბარიც იმაზეც, თუ რა სარგებელი მიიღო კვლევში „ჯორჯიან სტოუნმა“ და მასთან დაკავშირებულმა კომპანიებმა სახელმწიფოსგან, მათ შორის სახელმწიფო პროგრამა „აწარმოე საქართველოს” ფარგლებში.
„ჯორჯიან სტოუნის“ დირექტორთან კონტაქტზე ვერ გავედით. ბადრი რომანაძესთან ვერც ქობულეთის მერიამ დაგვაკავშირა. რაც შეეხება თავად უწყების პოზიციას, „საერთაშორისო გამჭვირვალობა საქართველო“-ს კველვას აქ მხოლოდ წერილობით ეხმაურებიან, რომელშიც განმარტებულია, რომ მუდმივმოქმედი სატენდერო კომისიის მიერ სატენდერო პირობების ჩამოყალიბება ხდება მარეგულირებელი კანონმდებლობის მოთხოვნების შესაბამისად, ხოლო პრეტენზიების შემთხვევაში პრეტენდენტებს შეუძლიათ მიმართონ დავების განხილვის საბჭოს ან შემდგომ ინსტანციებს, რაც არც ერთ შემთხვევაში არ მომხდარა. წერილში ასევე, ხაზგასმულია, რომ კვლევაში მოყვანილ ტენდერებთან დაკავშირებით, მაკონტროლებელი ორგანოების მიერ არც ერთხელ არ ყოფილა შენიშვნა უშუალოდ სატენდერო პირობებთან დაკავშირებით. მერია ასევე აღნიშნავს, რომ ,,ჯორჯიან სტოუნის“ დირექტორის ნათესაური კავშირი მუნიციპალიტეტეის ზედახედველობის და გამწვანების სამსახურების უფროსებთან: მინდია და ზვიად რომანაძეებთან ვერ იქნება დაკავშირებული შეყიდვებთან, რამდენადაც ისინი არ არიან სატენდერო კომისიის შემადგენლობაში.
7
s
s
s