27, აპრილი 2020 22:10:00
20 მილიონ ლარზე მეტი- ამ თანხას აჭარა კორონავირუსთან ბრძოლაში დახარჯავს. ადგილობრივმა ხელისუფლებამ საგანგებო ბიუჯეტზე მუშაობა დაასრულა. საშიში ვირუსის სამართავად ფული ჩაშლილი კულტურული ღონისძიებებიდან გამოთავისუფლდა. რას მოხმარდება და როგორ გადანაწილდება მილიონები - თეო ფუტკარაძე დაესწრო დღეს მთავრობის სხდომას
კორონავირუსის წინააღმდეგ ბრძოლისთვის, აჭარის მთავრობამ, ოც მილიონ ლარიანი საგანგებო ბიუჯეტის პროექტი შეადგინა. დოკუმენტის მიხედვით, აქედან დაიფარება ის ხარჯები, რომლებიც საკარანტინე სივრცეებში პირველადი ჯანდაცვისთვის არის საჭირო.
როგორც პრეზენტაციაზე გახდა ცნობილი, ამავე საგანგებო ბიუჯეტიდან უნდა დასრულდეს ბათუმის რესპუბლიკური საავადმყოფოს ინვენტარით აღჭურვაც.
ჯანდაცვასთან ერთად, პრიორიტეტად დასახელდა სოფლის მეურნეობაც, რაც იმას ნიშნავს, რომ უნდა გაიცეს შეღავათიანი აგროკრედიტები, თუმცა მთავობის თავმჯდომარეს დღეს არ უსაუბრია დეტალებზე, არის თუ არა, რომელიმე საფინანსო ორგანზიაციასთან შეთანხმება, ან მიმდინარეობს თუ არა კონკრეტული მოლაპარაკებები. რიჟვაძის თქმით, მალე ვნახავთ სამოქმედო გეგმას ტურიზმის მიმართულებითაც.
კოვიდ 19-ის წინააღმდეგ საბრძოლველად სპეციალური ბიუჯეტისთვის თანხების მობილიზება, როგორც პრეზენტაციაზე ითქვა, ძირითადად მხარჯავი ორგანიზაციებიდან მოხდა. მათ შორის იმ განუხორციელებელი სპორტული თუ კულტურული ღონისძიებების ხარჯზე, რომლებიც კორონავირუსის პანდემიის მიზეზით ვერ განხორცილედა. ორ მილიონ ნახევარი ლარი კი ადმინისტრაციული და წარმომადგენლობითი ხარჯების შემცირებით მოიგეს.
ბიუჯეტის პროექტი აჭარის უმაღლესმა საბჭომ უნდა დაამტკიცოს. დოკუმენტი განსახილველად დღესვე გადაიგზავნა.