აჭარის საგანგებო ბიუჯეტს, რომელიც ადგილობრივმა ხელისუფლებამ უმაღლეს საბჭოს გუშინ წარუდგინა, კენჭს ხვალ უყრიან. იმ შემთხვევაში თუ დოკუმენტი დამტკიცდება, რეგიონში 20 მილიონ ლარზე მეტი დაიხარჯება კორონავირუსთან საბრძოლველად. პრიორიტეტი იქნება პირველადი ჯანდაცვა, სოფლის მეურნეობა, განათლება და სოციალური მიმართულება. რეგიონის საგანგებო ფინანსური დოკუმენტი დეპუტატებმა დღეს ხმაურის ფონზე განიხილეს. შენიშვნები აქვს ოპოზიციას. როგორ დათვალეს და რამდენად მიზნობრივად გაიწერა თანხები კოვიდ 19-ის წინააღმდეგ საბრძოლველად?თეო ფუტკარაძე დაესწრო დღეს რეგიონის წარმომადგენლობით ორგანოში ბიუროს სხდომას და შეფასებებიც მან მოისმინა.
რამდენად მიზნობრივად გაიწერა საგანგებო ბიუჯეტიდან თანხები კოვიდ 19-ის წინააღმდეგ ბრძოლისთვის - კოლეგებს შორის დაპირისპირება სწორედ აზრთა სხვადასხვაობას მოჰყვა. ერთადერთი ოპონენტი, რომელიც ბიურის სხდომას ესწრებოდა, „ნაციონალური მოძრაობიდან“, ელგუჯა ბაგრატიონი იყო. გარდა იმისა, რომ მას გამოყოფილი თანხები ვირუსთან საბრძოლველად საკმარისად არ მიაჩნია, ფიქრობს, რომ საკარანტინე სივრცეებისთვის საჭირო თანხები მხოლოდ ცენტრალური ბიუჯეტიდან უნდა დაიხარჯოს.
უმაღლესი საბჭოს დამოუკიდებელი დეპუტატი - მერაბ ბლადაძე აღნიშნავს, რომ ადგილობრივ ხელისუფლებას მოცემულ მომენტში, საგანგებო ბიუჯეტში, იმაზე მეტი თანხის მობილიზება არ შეეძლო, ვიდრე 23 მილიონი ლარია, თუმცა იგი იზიარებს კოლეგის პოზიციას და ამბობს, რომ საკარანტინე სივრცეების მართვისთვის თანხებს სრულად სახელმწიფო უნდა ფარავდეს.
შინიშვნა აქვთ „ევროპულ საქართველოშიც“. პეტრე ზამბახიძე ფიქრობს, რომ აჭარის მთავრობამ დოკუმენტი დაგვიანებით დაამუშავა. დეპუტატი განმარტვას, რომ თუ კი პრიორიტეტად სოფლის მეურნება სახელდება, საგაზაფხულო სამუშაოების ხელშესაწყობად თორნიკე რიჟვაძის გუნდს მეტად ოპერატიულად უნდა ემუშავა.
მმართველ გუნდში ოპონენტების შენიშვნებს არ იზიარებენ. აცხადებენ, რომ 23 მილიონიანი საგანგებო ბიუჯეტი დროული, რაციონალურად განაწილებული და ამ ეტაპისთვის საკმარისია.
აჭარის უმაღლეს საბჭოში, საგანგებო ბიუჯეტის პროექტს, ბიუროებსა და კომიტეტებზე ხვალაც განიხილავენ, საბოლოოდ კი კენჭს დღის მეორე ნახევარში უყრიან.
3
s
s
s