30, აპრილი 2020 12:58:00
ბათუმის მასშტაბით აბონენტებს მოხმარებული წყლის საფასური სამი თვის განმავლობაში (მარტი, აპრილი, მაისი) სრულად დაუფინანსდებათ.
„ბათუმის წყლის“ გენერალური დირექტორის მარიკა გვიანიძის განცხადებით, აღნიშნული გადაწყვეტილება კორონავირუსის გავრცელების გამო, შექმნილი ვითარებიდან გამომდინარე, საქართველოს მთავრობის მიერ დაწესებული შეღავათების ფარგლებში იქნა მიღებული.
„საქართველოს მთავრობის მიერ მოხდა ძალიან მნიშვნელოვანი გადაწყვეტილების მიღება, კერძოდ 28 აპრილს ხელი მოეწერა დადგენილებას, რომლის საფუძველზეც, კომუნალური აბონენტების წყალისა და წყალარინების საფასური სუბსიდირებული იქნება სრულიად სახელმწიფოს მიერ. ეს აღარ იქნება დამოკიდებული, არც ელექტროენერგიისა და არც გაზის მოხმარების რაოდენობაზე. აბონენტები, რომლებმაც გადაიხადეს მარტის თვის საფასური, მათ გადახდილი თანხა შეუძლია გამოითხოვონ ან გატარდება მათ სააბონენტო ბარათზე და გადანაწილდება მომდევნო თვეებზე, როდესაც დასრულდება სუბსიდირება.“
როგორც, „ბათუმის წყლის“ გენერალური დირექტორი მარიკა გვიანიძე განმარტავს, აღნიშნული შეღავათი ვრცელდება მხოლოდ ფიზიკურ პირებზე. შეღავათი არ შეეხება კომერციულ ობიექტებს, არც ძველ დავალიანებებს.
„სუბსიდირება მოიაზრებს მხოლოდ, მოსახლეობის მიერ დახარჯული წყლის ანაზღაურებას და ის არ ვრცელდება ძველ დავალიანებასა და კომერციულ ობიექტებსა და საბიუჯეტო ორგანიზაციებზე. არავითარი ლიმიტი არ არის არც თანხისა და კუბადორობის მიხედვით, რამდენიც იქნება დანახარჯი მოსახლეობის და აღრიცხული იქნება ლიცენზიანტი კომპანიების მიერ, შესაბამისად მოხდება ანაზღაურება, უნდა აღვნიშნო, რომ ეს არის ძალიან მნიშვნელოვანი გადაწყვეტილება, როგორც მოსახლეობისათვის, ასევე ლიცენზიანტი კომპანიებისათვის არის დიდი დახმარება“.
მოქალაქეებს, რომელთაც აღნიშნული შეღავათის გამოყენება არ სურთ იმ მოტივით, რომ მათ აქვთ გადახდის შესაძლებლობა და სურთ, გამოთავისუფლებული თანხები მიმართული იყოს სხვა მნიშვნელოვანი პროგრამებისკენ, აპრილისა და მაისის სუბსიდიაზე უარის დაფიქსირება შეუძლიათ კომისიის ვებგვერდზე (www.gnerc.org/ge/covid-19). აპრილის კომუნალურ შეღავათებზე უარის თქმის ბოლო ვადაა 2020 წლის 11 მაისი.
R