01, სექტემბერი 2020 16:14:00
მოზარდის პიროვნებად ჩამოყალიბებისათვის აუცილებელია მშობლების სწორი მიდგომა აღზრდის საკითხებთან. ჯანსაღი გარემოს შექმნა მშობლების უპირველესი მოვალეობაა.
გთავაზობთ რეკომენდაციებს, რომლებიც დაგეხმარებათ თქვენ და თქვენს შვილებს უმტკივნეულოდ დაძლიოთ სკოლასთან ადაპტაციის სირთულეები:
1. ბავშვებთან ურთიერთობის პროცესში გამოხატეთ თქვენი კეთილგანწყობილი დამოკიდებულება. აგრძნობინეთ, რომ გიყვართ და ყოველთვის დაეხმარებით მას რთული სიტუაციის დაძლევაში. ეს ხელს უსაფრთხო გარემოს შექმნას შეუწყობს.
2. ბავშვის ქცევის შეფასებისას შეაფასეთ მხოლოდ მისი კონკრეტული ქმედება და არა მთლიანი პიროვნება.
3. კონკრეტული ქმედების შეფასებისას ეცადეთ, ხშირად აღნიშნოთ მისი დადებითი ქმედებები. უარყოფითი საქციელის შეფასება კი დაიწყეთ იმით, რომ ის ძალიან გიყვართ, თუმცა მისი ქცევა მიუღებელია და გამოთქვით იმედი, რომ იგი მას აუცილებლად გამოასწორებს. ასეთი დამოკიდებულება ხელს შეუწყობს მიუღებელი ქცევის დადებითით ჩანაცვლებას.
4. მოითხოვეთ მისგან მხოლოდ ის, რისი შესაძლებლობებიც აქვს. ნუ შეადარებთ უფროს და-ძმებს და თანაკლასელებს. ეს მათში აგრესიას გამოიწვევს სხვების მიმართ, საკუთარი თავის მიმართ კი ჩამოუყალიბდებათ უსუსურობის განცდა.
5. გახსოვდეთ, ყველა ბავშვს აქვს თავისი განვითარების ინდივიდუალური რიტმი და პირველი კლასის პირველ სემესტრში ან/და სკოლაში სწავლების პირველ წლებში წარუმატებლობა არ ნიშნავს მომავალში წარუმატებლობას.
ყველა ბავშვი განსხვავდება ერთმანეთისგან. ვინ სად და როდის გამოავლენს საკუთარ უნიკალურ შესაძლებლობებს ხშირად ამოუცნობია. მთავარია მოთმინება და ჩვენი მხრიდან მხარდაჭერა. ასევე, ბავშვში არსებული შესაძლებლობების მაქსიმალური ძალისმევით გამოვლენა და განვითარება.