12, სექტემბერი 2020 22:07:00
ზუგდიდში, სოფელ ინგირში, შუახნის კაცი გარდაიცვალა, რომელსაც სავარაუდოდ, თხილის სატეხით სცემეს. პირს, დაზიანებები თავის არეში ჰქონდა, რის შემდეგაც ორი ოპერაცია ჩაუტარდა.
დაკავებულ ორ ადამიანს ბრალი დაუმძიმდა. ინფორმაციას შინაგან საქმეთა სამინისტრო ავრცელებს.
"სამეგრელო-ზემო სვანეთის პოლიციის დეპარტამენტის თანამშრომლების მიერ ზუგდიდში, ჯგუფური ძალადობის ბრალდებით დაკავებულ 2 პირს ბრალი დაუმძიმდა. ბრალდებულებმა, მიმდინარე წლის 9 სექტემბერს, ზუგდიდში, სოფელ ინგირში, 1982 წელს დაბადებულ ი.ჭ.-ს ფიზიკური შეურაცხყოფა მიაყენეს, მიღებული დაზიანებების შედეგად დაშავებული 11 სექტემბერს კლინიკაში გარდაიცვალა.
გამოძიება სისხლის სამართლის კოდექსის 117-ე მუხლის მე-5 ნაწილის "ე" ქვეპუნქტით გრძელდება, რაც ჯგუფურად ჩადენილ ჯანმრთელობის განზრახ მძიმე დაზიანებას გულისხმობს. ჩადენილი დანაშაული 7-დან 10 წლამდე ვადით თავისუფლების აღკვეთას ითვალისწინებს“, - ნათქვამია უწყების მიერ გავრცელებულ ინფორმაციაში.
ცნობისთვის, დაპირისპირება 9 სექტემბერს მოხდა. დანაშაული 12 წლამდე ვადით თავისუფლების აღკვეთას გულისხმობს. დაკავებულები ქუთაისის საპატიმროში იმყოფებიან.