24, სექტემბერი 2020 15:58:00
უკანონოდ შესახლებულთა საპროტესტო აქცია ქობულეთში. უცვლელი მოთხოვნა ხელისუფლების მიმართ. მოქალაქეები სასმელი წყლით უზრუნველყოფას ითხოვენ. უფრო ვრცლად ვნახოთ სიუჟეტში.
ქობულეთში, ახალსოფელი ის სოფელია, სადაც ოჯახები საყოფაცხოვრებო მოხმარებისთვის დღემდე, მხოლოდ წვიმის წყალს იყენებს. სასმელი წყლის მარაგის შესავსებად კი კილომეტრებს გადიან. სოფელში, ყოფილი თბოელექტროსადგურის ტერიტორიაზე მცხოვრებლების წლების ბრძოლა შედეგს ვერ იღებს.
მიუხედავად უშედეგო მცდელობებისა, თვითმმართველობამდე ხმის მიწვდენა კიდევ ერთხელ, მორიგი საპროტესტო აქციით სცადეს. თუ ქობულეთის მერიისგან რეაგირებას ვერც ამჯერად დაინახავენ, აპირებენ აქციებით უკვე აჭარის მთავრობის ადმინისტრაციის შენობასთან გადმოინაცვლონ.
იმის გამო, რომ ყოფილი თბოელექტროსადგურის ტერიტორიაზე არსებული შენობა ოჯახების საკუთრებას არ წარმოადგენს, არც ელექტოენერგიის აბონენტებად არიან დარეგისტრირებულნი და არც ბუნებრივი აირი აქვთ. ქობულეთის მერიაც სწორედ ამას განმარტავს წერილობით პასუხში. გვეუბნება, რომ თვითნებურად დაკავებული შენობა სახელმწიფო ქონების ეროვნული სააგენტოს საკუთრებაა, რის გამოც მათი მოთხოვნების დაკმაყოფილება ვერ ხერხდება.