01, ოქტომბერი 2020 15:59:00
"ქართულმა ოცნებამ" აჭარის უმაღლესი საბჭოს კანდიდატთა პარტიული სია წარადგინა. სიის პირველი ნომერია აჭარის მთავრობის თავმჯდომარე თორნიკე რიჟვაძე. სიაში მეორე ადგილს აჭარის უმაღლესი საბჭოს მოქმედი თავმჯდომარე - დავით გაბაიძე იკავებს. სიაში მესამეა აჭარის ფინანსთა და ეკონომიკის მინისტრი - ჯაბა ფუტკარაძე. მას მოსდევს მოადგილე - თინათინ ზოიძე. ათეულში მეხუთეა ბათუმის საარჩევნო შტაბის უფროსი - გიორგი მანველიძე, მეექვსე კი აჭარის უმაღლესი საბჭოს წევრი - ირაკლი ჭეიშვილი. მეშვიდე და მერვე ადგილს ხელვაჩაურის საკრებულოს თავმჯდომარე - ნადიმ ვარშანიძე და საქართველოს პარლამენტის წევრი - ფატი ხალვაში იკავებენ. სიის მეცხრე ნომერია აჭარის უმაღლესი საბჭოს წევრი - დავით თედორაძე, პარტიული სიის ათეულს ასევე აჭარის უმაღლესი საბჭოს წევრი - ლადო მგალობლიშვილი ასრულებს.
„ქართული ოცნება-დემოკრატიული საქართველო“ დღესვე, საღამოს რვა საათზე 2020 წლის საარჩევნო პროგრამის პრეზენტაციას გამართავს.