28, ივნისი 2017 14:05:00
საქართველოს საკონსტიტუციო სასამართლო 28 ივნისიდან 1-ელი ივლისის ჩათვლით ევროპის საკონსტიტუციო სასამართლოების XVII კონგრესს თავმჯდომარის რანგში უმასპინძლებს. დაგეგმილი ღონისძიების ფარგლებში ბათუმს 40-ზე მეტი ევროპული ქვეყნის საკონსტიტუციო სასამართლოს და რელევანტური ინსტიტუტის თავმჯდომარე და სხვა მაღალი რანგის დელეგატი ესტუმრება. ევროპის საკონსტიტუციო სასამართლოების წევრი ქვეყნების გარდა კონფერენციაში მონაწილეობას მიიღებენ ევროპის საბჭოს, ვენეციის კომისიის პრეზიდენტი, ადამიანის უფლებათა ევროპული სასამართლოს მოსამართლე, კონსტიტუციური მართლმსაჯულების რეგიონული და ლინგვისტური ჯგუფების ხელმძღვანელები და წარმომადგენლები.
საქართველომ 2014 წლის მაისში, ევროპის საკონსტიტუციო სასამართლოების თავმჯდომარეობა 3 წლის ვადით, ავსტრიის საკონსტიტუციო სასამართლოსგან გადაიბარა და ამჟამად, ის ერთადერთი ევროკავშირის არაწევრი ქვეყანაა, რომელიც კონგრესის თავმჯდომარედ იქნა არჩეული. XVII კონგრესის თემა „საკონსტიტუციო სასამართლოების როლი კონსტიტუციური პრინციპების დაცვასა და გამოყენებაში“ იქნება.