ნოდარ სირბილაძე, ეკონომისტი - სპეციალურად TV25.GE-სთვის

მიმდინარე პერიოდში ისევ აქტუალური გახდა იპოთეკური სესხების სუბსიდირების გაგრძელების თემა. ამის ძირითად არგუმენტად მოჰყავთ ის, რომ თუ სამშენებლო სექტორი შემცირდება, ეს გამოიწვევს ნაკლებ აქტივობას და შესაბამისად სამუშაო ადგილებს შემცირებას. ამიტომ, თურმე მთავრობამ გადასახადის გადამხდელთა ფულით უნდა დაასუბსიდიროს იპოთეკური სესხები. ეს ფუნდამენტშივე არასწორი მიდგომაა. სესხების სუბსიდირება არც გასულ წელს უნდა მომხდარიყო და მითუმეტეს არც ახლა უნდა გაგრძელდეს.

სუბსიდიით ჩვენ, ფაქტობრივად, ხელოვნურად გვინდა შევინარჩუნოთ სამშენებლო ბაზარზე ფასი, მანამ სანამ კრიზისი არ დამთავრდება და  მოსახლეობის მსყიდველობითი უნარი არ გაიზრდება. მსყიდველობითი უნარის ზრდა კი კარგა ხანი ვერ მოხდება და თუ ჩვენ გავაგრძელებთ ხელოვნურად ამ დარგის ამ დონეზე შენარჩუნებას, ადრე თუ გვიან დადგება მომენტი, როცა სამშენებლო სექტორში ფასების კლება გარდაუვალი იქნება. ამას ვერ გავიქცევით, ამიტომ სხვისი ფულით ხელოვნურად ფასების ხელოვნურად შენარჩუნება არასწორია.

ამ ყველაფერს რომ თავი დავანებოთ, იპოთეკური სესხების სუბსიდიით სამშენებლო სექტორს ვაყენებთ უპირატეს მდგომარეობაში, სხვა ბიზნესებთან შედარებით. თითქოს სხვა ბიზნესებს არაფრად მივიჩნევთ და მხოლოდ სამშენებლო სექტორზე ვფიქრობთ. არადა მარტივია, როცა სესხების სუბსიდიით ადამიანს სტიმულს უჩენ, რომ ბინა იყიდოს, ამით ფაქტობრივად ადამიანს უჩენს სტიმულს რომ სხვა სამომხმარებლო პროდუქტებზე აღარ დახარჯოს ფული და მხოლოდ ბინაზე იყოს ორიენტირებული. ანუ ამით ხელოვნურად სხვა ბიზნესებს მოთხოვნას უმცირებ.

რეალობა ისაა, რომ სამშენებლო სექტორი უნდა დაემორჩილოს საბაზრო კანონზომიერებას, რაც მარტივად იმას ნიშნავს, რომ როდესაც მოთხოვნა მცირდება, მათაც ბუნებრივად შეამცირონ ფასი. ადრე თუ გვინა ამ რეალობის წინაშე დავდგებით, ხოლო ბიუჯეტიდან არაეფექტიანი ხარჯებით ჩვენ ყოველდღიურად ვუშვებთ შეცდომებს.

Tags:

გაზიარება

4