18, მარტი 2021 17:33:00
შვიდმა არასამთავრობო ორგანიზაციამ სასამართლო სისტემის რეფორმის კონცეფცია წარადგინა. მესამე სექტორი ხაზს უსვამს იმ პრობლემების აღმოფხვრის აუცილებლობას, რომლებიც სასამართლოს დამოუკიდებლობას აფერხებენ. ჩამონათვალში კი იუსტიციის უმაღლესი საბჭოს მიერ მოსამართლეების არჩევას მოიაზრებენ. ორგანიზაციები აღნიშნავენ,რომ პროცესი გამჭვირვალე უნდა იყოს და ასევე უნდა მოხდეს საბჭოს დეცენტრალიზაცია. პრობლემას ხედავენ იმაშიც, რომ როდესაც მოსამართლეს უწევს არაგონივრულად დიდი მოცულობის დავათა განხილვა, „მაღალია დაუდევრობის, შეცდომის დაშვების რისკი“. ისინი სთავაზობენ, რომ საერთო სასამართლოებში მოსამართლეთა ოპტიმალური რაოდენობა განისაზღვროს, ასევე დაიხვეწოს საქმეთა განაწილების ელექტრონული სისტემა.