პოზნერი დაბადების დღეს საქართველოში ვეღარ გადაიხდის. ჩვენს ქვეყანაში რუსი ჟურნალისტის ვოიაჟი სკანდალით და აყალ-მაყალით დასრულდა. კრემლის პროპაგანდისტის იუბილე საპროტესტო აქციებმა ჩაშალა. სასტუმროში, სადაც პუტინის პირადი რეპორტიორი იყო დაბინავებული, სადღესასწაულო ტორტის ნაცვლად ქართველმა ხალხმა მას ქატო მიუტანა, შუშხუნების ნაცვლად კი კვერცხები ისროლეს. პარალელები პოზნერის და გავრილოვის ღამეებს შორის
რუსი ჟურნალისტი და კრემლის პროპაგანდისტი ალბათ ვერ წარმოიდგენდა, რომ საქართველოში დაბადების დღის აღსანიშნავად ჩამოსულს, თბილისის დატოვება ამ ფორმით და დროზე ადრე მოუწევდა. ვლადიმერ პოზნერმა და მისმა მეგობრებმა, რომელთა ჩამოსვლამაც ხმაური გამოიწვია, პროტესტის გამო თბილისში დარჩენა 24 საათიც ვერ შეძლეს და გამთენიისას, ჩარტერული რეისით გაფრინდნენ.
მანამდე კი, რუსულ მედიასთან საუბრისას, საქართველოდან დროზე ადრე გამგზავრება არც თავად კრემლის იდეოლოგმა გამორიცხა. პოზნერი თბილისიდან მოსკოვში დაბრუნებას 3 აპრილს აპირებდა, თუმცა, გეგმები მწვავე პროტესტის გამო შეეცვალა.
ვლადიმერ პოზნერი 50-ამდე პირთან ერთად საქართველოში 31 მარტს, დაბადების დღის აღსანიშნავად ჩამოვიდა. ინფორმაციის გასაჯაროებიდან მალევე სამოქალაქო აქტივისტებმა პუტინის მეგობრებს დისკომფორტი ყველა ლოკაციაზე შეუქმნეს. სტუმრებს სასტუმრო რუმსის და სასტუმრო ვინოტელის დატოვება პოლიციის დახმარებით მოუხდათ. შეკრებილებმა ავტობუსს კვერცხები დაუშინეს.
ირაკლი ღარიბაშვილი ამბობს, რომ პოზნერს, რომელიც ამერიკის მოქალაქეა, ოკუპაციის შესახებ კანონი არ დაურღვევია. პრემიერის ინფორმაციით, სტუმრებს ე.წ. კოვიდ პასპორტიც ჰქონდათ. პრემიერი პრობლემას არა ოკუპანტი ქვეყნის წარმომადგენელთა ვიზიტში, არამედ პროტესტის ფორმაში ხედავს.
პრობლემა ვერ დაინახეს, თუმცა პროტესტის ფონზე, ჯარიმის გამოწერა მაინც მოუხდათ. რუსი ჟურნალისტის ვლადიმერ პოზნერის მასპინძლობისთვის შრომის ინსპექციამ სასტუმრო ვინოტელი 10 ათასი ლარით დააჯარიმა. შინაგან საქმეთა სამინისტროს განმარტებით კი იზოლაციისა დაკარანტინის წესის დარღვევის ფაქტზე დაჯარიმდა სასტუმროში მყოფი 32 პირიც.
ოპოზიციის ინფორმაციით, რუსი ჟურნალისტის და დელეგაციის სხვა წევრების ქვეყანაში შემოშვების გადაწყვეტილება უმაღლეს დონეზე მიიღეს და საკითხზე ინფორმირებული იყო შინაგან საქმეთა მინისტრიც.
მმართველი გუნდი სამოქალაქო აქტივისტების პროტესტს ფსევდო პატრიოტიზმით შეფუთულ სამარცხვინო ისტერიად აფასებს.
აფხაზეთი არასდროს გახდება საქართველოს ნაწილი - ამ სიტყვების ავტორი სამოქალაქო საზოგადოებამ საქართველოდან გააძევა.
3
s
s
s