დაიკეტა თუ არა მოლაპარაკებების ყველა ფანჯარა ? ევროკავშირის ოფიციალური წარმომადგენლის გამგზავრებიდან ზუსტად 2 დღეში „ქართული ოცნება“ ოპოზიციასთან დიალოგის გაგრძელებაზე უარს ამბობს. მმართველი გუნდი ვადამდელი არჩევნების თემასაც საბოლოოდ ხურავს. ოპოზიციაში კი ფიქრობენ, რომ ხისტი დამოკიდებულებებით ივანიშვილის მთავრობა პოლიტიკურ კრიზისს კიდევ უფრო ამწვავებს. აქ დარწმუნებულები არიან, რომ ქვეყანა ევროპულ გზის საბოლოოდ ასცდა, შექმნილი ვითარების გაპროტესტებას კი ისევ ქუჩის აქციებით გეგმავენ.
მოლაპარაკებების ჩაშლის შემდეგ, პრემიერ-მინისტრი დღეს პირველად გამოჩნდა. გამოჩნდა და დაუფარავად განაცხადა, რომ ოპოზიციასთან საუაბრი დროის დაკარგვაა. როგორც ღარიბაშვილმა დააანონსა, „ქართული ოცნება“ ამიერიდან მხოლოდ ქვეყნის მართვით დაკავდება.
საპირისპიროს ამბობენ ოპოზიციაში. ხელისუფლების ოპონენტები ფიქრობენ, რომ პოლიტიკურ კრიზისს სწორედ ღარიბაშვილი აღრმავებს. თქვეს ისიც, რომ პრემიერმა, ამ განცხადებით, მხოლოდ, მისი პარტიული აქტივის გულის მოგება სცადა.
ახლა ოპოზიცია ერთადერთ გამოსავალს ისევ ქუჩის მასშტაბურ აქციებში ხედავს. პოლიტიკური პარტიები, რომლებიც უკვე მე-6 თვეა საყოველთაო ბოიკოტის რეჟიმში რჩებიან, მზაობას გამოთქვამენ, მოლაპარაკების მაგიდას დაუბრუნდნენ, თუმცა მხოლოდ ერთი პირობით - მმართველი გუნდი დათმობაზე წავიდეს.
ორაზროვანი განცხადებებით გამოეხმაურნენ პრემიერ-მინისტრის დღევანდელ ხმაურიან გამოსვლას, მმართველი გუნდის წევრები. „ქართულ ოცნებაში“ ამბობენ, რომ ოპოზიციის ახირებებზე დრო აღარ უნდა დაიკარგოს.
მოლაპარაკებები დაპაუზდა თუ საბოლოოდ შეწყდა - მთავარი კითხვა ახლა ასე ჟღერს. ოპოზიცია ახლა 15 მაისის მასშტაბური აქციისთვის, მმართველი გუნდი კი ოქტომბრის თვითმმართველობის არჩევნებისთვის ემზადება.
6
s
s
s