20, აგვისტო 2021 21:29:00
კურორტ ბეშუმიდან რამდენიმე კილომეტრით დაშორებულ მთაზე, რომელსაც ადგილობრივები უჩხოს „იაილას“ ეძახიან, ხულოს მუნიციპალიტეტის სოფელ უჩხოს მოსახლეობა მემთეურობას ეწევა. მესაქონლეობა მათი შემოსავლის ძირითადი წყაროა. უხუცესები, მუდმივი საცხოვრებელი სახლიდან, ათეული კილომეტრით დაშორებულ მთაზე, ამ შრომატევადი საქმით, ოჯახის სარჩენად არიან დაკავებულები. რამდენიმე დღის წინ აქ, ერთდროულად, რამდენიმე მსხვილფეხა პირუტყვი ერთ დღეს დაიკარგა.
მემთეურები, მარჩენალი ძროხების ქურდობას არ გამორიცხავენ. ამბობენ, რომ მსხვილფეხა რქოსანი პირუტყვის მოულოდნელი გაუჩინარება, პირველი ფაქტი არ არის და ათობით საქონელი ასე უკვალოდ, ყოველწლიურად იკარგება.
ამ მთიდან, რამდენიმე კილომეტრის დაშორებით საქართველო - თურქეთის საზღვარია. დროებით მცხოვრებლები ქურდობასთან ერთად, ძროხების ამ საზღვარზე გადასვლის ვარიანტსაც განიხილავენ. ამბობენ, რომ საზღვარზე დამონტაჟებული სათვალთვალო კამერები დაკარგული საქონლის ნახვის შესაძლებლობას იძლევა, თუმცა საგამოძიებო უწყებები და ხელისუფლება ამ შანსს არ იყენებს და არც დაზარალებული მოსახლეობის ინტერესებს ითვალისწინებს. მემთეურები სათვალთვალო კამერების ჩანაწერების გადამოწმებასა და ზარალის ანაზღაურებას ითხოვენ.
ოპოზიცია ხელისუფლებას უმოქმედობაში ადანაშაულებს და ფაქტების დროულ გამოძიებას მოითხოვს. აცხადებენ, რომ კრიმინალი ყოველწლიურად მზარდია, თუმცა შესაბამისი უწყებები, რეალურ ფაქტებს სტატისტიკის შესამცირებლად მალავს.
ხულოს მთებიდან, მსხვილფეხა რქოსანი პირუტყვის დაკარგვის ფაქტს, შსს ხულოს რაიონული სამმართველო იძებს. რა ეტაპზეა და რა მუხლით მიმდინარეობს გამოძიება? თემაზე სატელევიზიო კომენტარი არ გააკეთეს. ჩვენს კითხვაზე, 2017 წლიდან დღემდე, მთებზე საქონლის დაკარგვის უამრავი ფაქტიდან, რომელიმე მათგანი დღემდე თუ გამოიძიეს, გვითხრეს, რომ შედეგი არცერთ შემთხვევაზე არ დაგდგარა და ყველა ფაქტთან დაკავშირებით გამოძიება საქონლის დაკარგვის მუხლით გრძელდება.