85 ათას ლარამდე გახარჯული თანხა და უფუნქციოდ დარჩენილი ჩოგბურთის კორტები ქედაში. ჩაიბარეს თუ არა იმჟამინდელმა თანამდებობის პირებმა დაუსრულებელი სამუშაობი , რის გამოც ჩოგბურთელები დღეს იქ ვარჯიშს ვერ ახერხებენ? რა ბედი ელის სპორტის ამ სახეობას სამომავლოდ?
მიუხედავად იმისა, რომ ჩოგბურთის კორტების მოსაწყობად ქედაში 2011 წელს 84 667 ლარი დაიხარჯა, სპორტული წვრთნები აქ 2012 წლის თებერვლის შემდეგ არ ჩატარებულა, მიზეზი მწყობრიდან გამოსული ხელოვნური საფარია, რომელიც სპორტული ობიექტის ჩაბარებიდან რამდენიმე თვეში დაზიანდა. ირაკლი ბარამიძის გამგებლობის დროს მოწყობილ ამ ობიექტზე გამოძიება 2016 წელს დაიწყო, სამსახურებრივი უფლებამოსილების ბოროტად გამოყენებასა და სამსახურებრივ სიყალბეში ბრალი ქედის გამგებლის ყოფილ მოადგილეს, ასევე გამგეობის საფინანსო და ზედამხედველობის სამსახურების ყოფილ უფროსებს დასდეს. პროკურატურის მტკიცებით, ქედის მერიის ყოფილმა თანამდებობის პირებმა დაუსრულებელი სამუშაოები ჩაიბარეს, თუმცა სასამართლომ ყოფილი საჯარო მოხელეები გაამართლა.
კითხვაზე - სასამართლო დავის დასრულების შემდეგ, იმსჯელა თუ არა მერიამ კორტებთან დაკავშირებით და რა ფუნქციას შეითავსებს სპორტული ობიექტი, რაზეც ადგილობრივი ბიუჯეტიდან ათასობით თანხა დაიხარჯა? ინფრასტრუქტურის სამსახურის უფროსმა გვითხრა, რომ მერიას კორტებთან დაკავშირებით ამ ეტაპზე კონკრეტული სამოქმედო გეგმა არ გააჩნია, სამომავლო სტატუსი კი ქედელი ახალგაზრდებისა და სასპორტო სკოლის გადასაწყვეტია.
კორტების გვერდით ახლა მინი სპორტული მოედანის რეაბილიტაცია მიმიდინარეობს, სასპორტო სკოლის სასწავლო ნაწილის გამგე, ფიქრობს, რომ სპორტსკოლისა და ახალგაზრდებისთვის უკეთესი იქნება, თუ კორტები მინი სპორტულ მოედანს შეუერთდება, რაც საფეხბურთო კლუბ ქედის „ბეთლემს“ შესაძლებლობას მისცემს სათადარიგო მოედნად გამოიყენოს.
სულიკო ბოლქვაძის შეფასებითა და წინასწარი გათვლებით, იმ შემთხვევაში თუ კორტები ფუნქციას დაიბრუნებს რეაბილიტაციას 45 000 -მდე ლარი, სპორტულ მოედნად გადაკეთებას კი გაცილებით მეტი თანხა დასჭირდება.
ამ დროისთვის ქედის სასპორტო სკოლის ბაზაზე სპორტის ექვსი სახეობა ისწავლება, სპორტულ წვრთნებს აქ, ძირითადად სკოლის ასაკის ქედელი ახალგაზრდები გადიან.
სიუჟეტი ამერიკის საელჩოს მხარდაჭერითაა მომზადებული. აქვე გეტყვით, რომ თუ გჭირდებათ ჩვენი დახმარება, დარეკეთ ნომერზე, 579 34 24 24
2
s
s
s